XNAQʼTZBʼIL 2
Kykʼujlamxix kyibʼe kyxole
«Aju ma tzʼok tmojbʼaʼn Dios, miʼn tzʼel tpaʼn xjal.» (Marcos 10:9)
Tajbʼil Jehová «tuʼn tten tkʼujlalila» (Miqueas 6:8). A jlu il tiʼj toj mejebʼleʼn, tuʼnju qa mintiʼ axix kʼujlalil mlay tzʼok qeʼ tkʼuʼj jun tiʼj juntl. Tuʼn tchʼiy kʼujlabʼil kyxol kabʼe xjal ilxix tiʼj tuʼn tok qeʼ tkʼuʼj jun tiʼj juntl.
Toj ambʼil jaʼlo, aju axix tok kʼujlabʼil toj mejebʼleʼn xiʼni tkubʼ naj. Tuʼn tok t-xqʼuqina tmejebʼleʼna il tiʼj tuʼn tkubʼ t-ximana tuʼn tbʼant kabʼe tiʼ tuʼna.
1 QʼONKUYA TNEJEL TOJ TANQʼIBʼILA AJU TMEJEBʼLEʼNA TWITZ TXQANTL TIʼCHAQ
¿TIʼ IN TZAJ TQʼAMAʼN TYOL DIOS? Kyskʼonktze «alkyeju mas bʼaʼn» (Filipenses 1:10). Aju tmejebʼleʼna atzun jun kyxol qeju tiʼchaq mas nim toklen toj tanqʼibʼila. Bʼaʼn tuʼn tkubʼ tqʼoʼna tnejel toj tanqʼibʼila.
Tajbʼil Jehová tuʼn tok tqʼoʼna twitza oʼkx tiʼj tukʼila ex tuʼn kytzalaje kykabʼile toj kyanqʼibʼile (Eclesiastés 9:9). In tzaj tqʼamaʼnxix Jehová tuʼn miʼn tel naj tukʼila tiʼj tkʼuʼja, sino tuʼn tjyona tumel tuʼn tten toj tzalajbʼil (1 Corintios 10:24). Qʼoʼnka tilil tuʼn tnaʼnte tukʼila qa at tajbʼen teya ex qa kʼujlaʼn tuʼna.
¿TIʼ JAKU BʼANT TUʼNA?
-
Kukx paʼmila ambʼil tuʼn ttena tukʼil tukʼila, ex qʼonxa ambʼil oʼkx te
-
Ximana kyiʼje kykabʼile nya oʼkx tiʼja
2 XQʼUQIʼNK TANMIYA
¿TIʼ IN TZAJ TQʼAMAʼN TYOL DIOS? «Alkye jun ma txi keʼyinte jun xuʼj ex in pon tkʼuʼj tiʼj tuʼn tbʼinchante mya bʼaʼn tukʼil, ma tbʼincha aj pajil tuj tanmi» (Mateo 5:28). Qa at jun xjal kukx in ximin tiʼjju tuʼn tbʼinchante nya bʼaʼn tukʼe juntl, toj juntl yol, in kubʼ tbʼinchaʼn il twitz tukʼil.
In tzaj tqʼamaʼn Jehová qa ilxix tiʼj tuʼn tok qxqʼuqin qanmi (Proverbios 4:23; Jeremías 17:9). Tuʼn tbʼant jlu, il tiʼj tuʼn tok t-xqʼuqin tibʼa tuʼn miʼn tok tqʼoʼn twitza tiʼj nya bʼaʼn (Mateo 5:29, 30). Bʼaʼn tuʼn tel tkanoʼna techel kyaj tqʼoʼn Job aju kubʼ tqʼoʼn jun ley tiʼj twitz tuʼn miʼn tok tqʼoʼn twitz tiʼj juntl xuʼj (Job 31:1). Qʼonkuxa toj tanmiya tuʼn miʼn tok tqʼoʼna twitza kyiʼj qe tilbʼilal jatumel in che etz yekʼun xjal mintiʼ kyxbʼalun tok. Ex bʼaʼn tuʼn tok t-xqʼuqin tibʼa tuʼn miʼn tchʼiy tkʼujlabʼila tiʼj jun xjal qa nya a tukʼila.
¿TIʼ JAKU BʼANT TUʼNA?
-
Yekʼunxa kye txqantl qa oʼkx tok tkʼuʼja tiʼj t-xuʼjila moqa tiʼj tchmila
-
Ximana tiʼjju in tnaʼn tukʼila, ex qa in yolina tukʼil jun xjal aju jaku tzaj tqʼoj tukʼila tuʼn, tzaqpink naja
