XNAQʼTZBʼIL 9
Tzʼajbʼena te Jehová kyukʼix qe toj tjaya
«Che kʼulune twitz ju bʼinchal kyaʼj, tukʼix txʼotxʼ.» (Apocalipsis 14:7)
Ik tzeʼn ma xnaqʼtzana tiʼj toj uʼj lu, at nim kawbʼil tkuʼx toj Tyol Dios aqeju jaku che onin tiʼja ex kyiʼj qe toj tjaya. Tajbʼil Jehová tuʼn kytzalaje. Ax ikx in zaj ttziyen qa ma kubʼ kyqʼoʼne tnejel toj kyanqʼibʼile «tkyaqiltzun [...] ktzajel qʼoʼn kyeye» (Mateo 6:33). Tajbʼil Dios tuʼn tok te kyamiwe. Tuʼntzunju, bʼaʼn tuʼn tok tilil tuʼna tuʼn tajbʼen tkyaqil ambʼil tuʼna tuʼn tchʼiy tamiwbʼila tukʼil, atzunju mas nim toklen jaku ten te jun xjal (Mateo 22:37, 38).
1 QʼOʼNKA TILIL TUʼN TCHʼIY TAMIWBʼILA TUKʼIL JEHOVÁ
¿TIʼ IN TZAJ TQʼAMAʼN TYOL DIOS? «Chin okele te Kymane, atzun kyeye che okele te nkyʼajale ex te nmeʼjele, chi Qman» (2 Corintios 6:18). Tajxix Jehová tuʼn tok te jun tbʼanel tamiwoya, jun tumel tuʼn tok laqʼeʼya ttxlaj aju qa ma naʼna Dios. In tzaj tqʼamaʼn Jehová tuʼn tbʼant jlu quʼn: «Miʼn che qʼajene tuʼn kynaʼne Dios» (1 Tesalonicenses 5:17). Tganxix Jehová tuʼn t-xi tqʼamaʼna aju in bʼaj tkʼuʼja tiʼj ex aju in ximanxixa tiʼj (Filipenses 4:6). Qa ma naʼna Dios kyukʼil toj tjaya, kbʼel kyximin qa axix tok at Dios toj twitza.
Noqtzun tuʼnj, nya oʼkx tuʼn tyolina tukʼil Dios, ax ikx il tiʼj tuʼn t-xi tbʼiʼna. ¿Tzeʼn jaku bʼant? Aju qa ma xnaqʼtzana tiʼj Tyol Dios ex kyiʼj qe uʼj in che etz tuʼn qxnaqʼtzan tiʼj Tyol Dios (Salmo 1:1, 2). Ximana tiʼjju in nel tnikʼa tiʼj (Salmo 77:11, 12). Tuʼn t-xi tbʼiʼna Dios, ax ikx nimxix toklen tuʼn t-xiʼya kyoj qe chmabʼil (Salmo 122:1-4).
Juntl tumel tuʼn tchʼiy tamiwbʼila tukʼil Jehová aju qa ma yolina tiʼj Tyol kyukʼil txqantl xjal. Qa kukx ma bʼant jlu tuʼna, mas nqayin ktela ttxlaj Dios (Mateo 28:19, 20).
¿TIʼ JAKU BʼANT TUʼNA?
-
Paʼmila ambʼil tuʼn tnaʼna Dios ex tuʼn tuʼjina tiʼj Xjan Uʼj tkyaqil qʼij
-
Qʼonxa onbʼil kye toj tjaya tuʼn tkubʼ kyqʼoʼn tnejel aju at toklen tukʼil taqʼun Dios twitzju saqchbʼil
2 TZALAJXA TIʼJJU AMBʼIL IN XI TQʼOʼNA KYUKʼIL TOJ TJAYA TE JEHOVÁ
¿TIʼ IN TZAJ TQʼAMAʼN TYOL DIOS? «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8). Paʼmila jun qʼij ex jun or tuʼn t-xnaqʼtzana kyukʼil qe toj tjaya tiʼj Tyol Dios (Génesis 18:19). Nya oʼkxju: ax ikx bʼaʼn tuʼn t-ximina tiʼj Dios tkyaqil qʼij ex onina kyiʼj qe toj tjaya tuʼn tchʼiy kyamiwbʼil tukʼil Dios. In tzaj tqʼamaʼn Tyol Dios: «Kukx kymanxe kye kykʼwaʼle, ex che yoline» tiʼj Jehová «tuj kyjaye ex tuj kybʼeye, ax ikx ok kyxiʼye tal ex ok kyjaw weʼye» (Deuteronomio 6:6, 7). Ikxwit teya t-ximbʼetz ik tzeʼn te Josué tej tqʼama: «Atzun weye kyukʼix kykyaqil qeju ateʼ tuj njaye, a qo ajbʼele te Qman» (Josué 24:15).
¿TIʼ JAKU BʼANT TUʼNA?
-
Kukx bʼinchankuya jun tajlal xnaqʼtzbʼil aju jaku tzʼonin tiʼj teyele junjun toj tjaya
