Tej tkubʼ tbʼinchaʼn Jehová tnejel ja xjal, xi tqʼoʼn kyoklen mambʼaj tuʼn tok kykwentin qe kykʼwaʼl (Colosenses 3:20). Tuʼnju aya tatbʼaj at toklena tuʼn t-xi t-xnaqʼtzaʼna qe tkʼwaʼla tuʼn tok kykʼujlaʼn Jehová ex tuʼn kyok te jun tbʼanel xjal aj kychʼiy (2 Timoteo 1:5; 3:15). Ax ikx il tiʼj tuʼn tel tnikʼa tiʼjju at toj kyanmi. Noqtzun tuʼnj, nim toklen techel kbʼel tqʼoʼna. Aju tbʼanel tumel tuʼn t-xi t-xnaqʼtzaʼna Tyol Dios kye qe tkʼwaʼla aju tuʼn tten tnejel toj tanmiya (Salmo 40:8).

¿TIʼ IN TZAJ TQʼAMAʼN TYOL DIOS? «Kykyaqile bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Santiago 1:19). Ax tok taja tuʼn kyyolin qe tkʼwaʼla tukʼila. Tuʼn tbʼant jlu, il tiʼj tuʼn t-xi tyekʼuna qa jaku txi tqʼoʼna ambʼil kye aj ttzaj kyqanin jun onbʼil teya. Qʼoʼnka tilil tuʼn tten tzalajbʼil toj tjaya tuʼn miʼn kytzaj xobʼ tkʼwaʼla tuʼn kyyolin tukʼila (Santiago 3:18). Qa ma kubʼ kyximin qa che okel tikʼlena, mlaylo tzaj kyqʼamaʼn tkyaqil teya. Tenx tpasensa ex kukx qʼamanxa kye qa kʼujlaʼn qe tuʼna (Mateo 3:17; 1 Corintios 8:1).

¿TIʼ JAKU BʼANT TUʼNA?

• Qʼonxa ambʼil kye tkʼwaʼla qa kyaj tuʼn kyyolin tukʼila

• Kukx yolina kyukʼil tkʼwaʼla nya oʼkx aj kyok weʼ twitz jun nya bʼaʼn

¿TIʼ IN TZAJ TQʼAMAʼN TYOL DIOS? «Qa ma txi tniman xjal aju xnaqʼtzbʼil in xi qʼoʼn te, bʼaʼn nneʼla te te» (Proverbios 16:20). At maj il tiʼj tuʼn t-ximana tiʼj tiʼ t-xilen kyyol tuʼn tel tnikʼa tiʼjju in kynaʼnxix. At maj in tzaj kyqʼamaʼn kuʼxin mas chʼintl twitzju in bʼaj moqa in tzaj kyqʼamaʼn aju mintiʼ in che ximen tiʼj. «Aju xjal in xi ttzaqʼweʼn naj jun yol naʼnxtoq tbʼinte, mintiʼ tnabʼl.» (Proverbios 18:13.)

¿TIʼ JAKU BʼANT TUʼNA?

• Qʼoʼnka tilil tuʼn miʼn tyolina qa in yolin tkʼwaʼla ex miʼn tzaj tqʼoja tiʼjju in tzaj tqʼamaʼn, noq tiʼxku jun in tzaj tqʼamaʼn

• Bʼaʼn tuʼn ttzaj tnaʼna tiʼ tnaʼya ex alkye nim toklen toj twitza tej ik tabʼqʼiya ik tzeʼn te tkʼwaʼla

¿TIʼ IN TZAJ TQʼAMAʼN TYOL DIOS? «Nkʼwaʼl, qʼonx twiʼya tiʼj xnaqʼtzbʼil in tqʼoʼn tmana, ex miʼn tzikʼ tnaʼl tuʼna aju xnaqʼtzbʼil in tqʼoʼn ttxuʼya» (Proverbios 1:8). O txi tqʼoʼn Jehová toklen mambʼaj ex txubʼaj kyibʼaj kʼwaʼl. Kykabʼil il tiʼj tuʼn t-xi kyqʼoʼn xnaqʼtzbʼil kye kykʼwaʼl tuʼn kyok te tbʼanel kʼwaʼl ex tuʼn tbʼant kybʼiʼn (Efesios 6:1-3). In nel kynikʼ kʼwaʼl tiʼj qa nya «junx kynabʼle ex junx kyximbʼetze» (1 Corintios 1:10). Tuʼntzunju, qa mintiʼ in mojeʼ kyximbʼetze tiʼj jun tiʼ, miʼn che jaw qʼojine kywitz kykʼwaʼle, tuʼnju jaku mlay chex bʼiʼntle kyuʼn.

¿TIʼ JAKU BʼANT TUʼNA?

• Bʼaʼn tuʼn tten junx kyximbʼetze tiʼj tzeʼn tten kxel kykawin qe kykʼwaʼle

• Qa nya junx taʼ t-ximbʼetza tukʼil tukʼila tiʼjju tzeʼn tten kxel kyxnaqʼtzaʼne qe kykʼwaʼle, bʼaʼn tuʼn tok tilil tuʼna tuʼn tel tnikʼa tiʼjju t-ximbʼetz

¿TIʼ IN TZAJ TQʼAMAʼN TYOL DIOS? «Kyqʼonxe xnaqʼtzbʼil kye kʼwaʼl tuʼn kybʼet tuj bʼe bʼaʼn» (Proverbios 22:6). Qa taja tuʼn t-xi tqʼoʼna tbʼanel xnaqʼtzbʼil kye tkʼwaʼla miʼn kyaj tqʼoʼna toj alkyexku ambʼil. Tzʼibʼinkuya tiʼ kxel t-xnaqʼtzaʼna ex tiʼ kawbʼil kxel tqʼoʼna kye (Salmo 127:4; Proverbios 29:17). Tuʼn t-xi kawit jun kʼwaʼl nya oʼkx a t-xilen tuʼn tkubʼ tkastiw, ax ikx a t-xilen tuʼn t-xi onit tuʼn tel tnikʼ tiʼj tiquʼn in kubʼ tqʼoʼna junjun kawbʼil tibʼaj (Proverbios 28:7). Ax ikx xnaqʼtzanxa qe tkʼwaʼla tuʼn tok kykʼujlaʼn Tyol Dios ex tuʼn tel kynikʼ kyiʼj kawbʼil ateʼkux toj (Salmo 1:2). Iktzun tten jaku chʼiy kynabʼl toj tbʼanel (Hebreos 5:14).

¿TIʼ JAKU BʼANT TUʼNA?

• Qʼoʼnka tilil tuʼn tok kyqʼoʼn tkʼwaʼla kywitz tiʼj qa axix tok at Dios ex qa jaku tzʼok qeʼ kykʼuʼj tiʼj

• Bʼaʼn tuʼn tonina kyiʼj tuʼn tel kynikʼ ex tuʼn tel kyikʼon junjun tiʼ aju jaku tzaj junjun nya bʼaʼn kyiʼj tuʼn, ik tzeʼn qeju in che etz yekʼun toj Internet. Qʼonxa xnaqʼtzbʼil kye tuʼn tel kyel oq kyiʼj xjal kyaj tuʼn kyyaẍin, moqa tuʼn kykyʼaʼjin