Aj tkubʼ mojeʼ jun xinaq, moqa ichan, tukʼil jun xuʼj, in tzaj nim wiq nya bʼaʼn kyxol. Jaku tzaj tuʼnju junxitl t-ximbʼetz jun twitz juntl, junxitl in tnaʼn jun twitz juntl moqa tuʼnju junxitl chʼiysabʼin kye. Ax ikx at maj jaku che tzaj junjun nya bʼaʼn nya axtzu toj kyja moqa jaku che tzaj junjuntl nya bʼaʼn noq minabʼen in che tzaj.

Aju mas nya kwest jaku bʼant kyuʼn aju tuʼn tikʼ tnaʼl aju nya bʼaʼn in che ok weʼ twitz, noqtzun tuʼnj, in tzaj tqʼamaʼn Tyol Dios tuʼn kyyolin tiʼjju nya bʼaʼn (Mateo 5:23, 24). Qa ma che japun tkawbʼil Dios kyuʼne jaku che kanet tumel tuʼn kyexe twitz nya bʼaʼn.

¿TIʼ IN TZAJ TQʼAMAʼN TYOL DIOS? «At tqʼijlalil tuʼn kyyolin» (Eclesiastés 3:1, 7). Paʼmila ambʼil tuʼn tyolina tiʼjju nya bʼaʼn: qʼamanxa toj tumel te tukʼila aju in tnaʼna ex tiʼ t-ximbʼetza at tiʼjju nya bʼaʼn. Kukx qʼamanxa aju axix tok (Efesios 4:25). Ax ikx qa in tnaʼna qa in qʼojina, miʼn tzʼok tena qʼojil. Jun tzaqʼwebʼil toj tumel jaku tzʼonin tuʼn miʼn txi jun nya bʼaʼn toj il (Proverbios 15:4; 26:20).

Axpe ikx qa nya junx taʼ t-ximbʼetza tukʼil tukʼila, miʼn kyaj ttzaqpiʼna tuʼn toka te tbʼanel xjal; kukx yekʼunxa kʼujlabʼil ex kukx yekʼunxa qa nim toklen teya (Colosenses 4:6). Bʼaʼn tuʼn tok tilil tuʼna tuʼn tkyaj naj jun nya bʼaʼn toj tumel, ex miʼn kyaj kytzaqpiʼne tuʼn kyyoline (Efesios 4:26).

¿TIʼ JAKU BʼANT TUʼNA?

• Bʼaʼn tuʼn tel tpaʼna jun tbʼanel ambʼil tuʼn kyyoline tiʼj nya bʼaʼn

• Bʼaʼn tuʼn tok tilil tuʼna tuʼn miʼn tyolina qa in yolin tukʼila. Kpol ambʼil tuʼn tyolina

¿TIʼ IN TZAJ TQʼAMAʼN TYOL DIOS? «Kykʼujlam kyibʼe kyxolxe porque kyitzʼin kyibʼe; tzʼok tililx kyuʼne tuʼn kynimanjtz qe mastl okslal ex mya oʼkx aqeye tuʼn kynimanjtze» (Romanos 12:10). Nimxix toklen tuʼn tkubʼ tbʼiʼna ex tuʼn tok tilil tuʼna tuʼn tel tnikʼa tiʼjju t-ximbʼetz tukʼila, «qʼaqʼanx kykʼuʼje tiʼj juntl» ex «che oke mans» (1 Pedro 3:8; Santiago 1:19). Miʼn kubʼ tyekʼuna qa in nokxix tbʼiʼna aju in tzaj tqʼamaʼn tukʼila ex nya ax tok qa in nok tqʼoʼn twiʼya tiʼj. Qa jaku bʼant, tzaqpinkja aju in bʼinchana tiʼj ex qʼonxa tkyaqilju ambʼil te, moqa jaku txi tqʼamaʼna te qa jaku che yoline yajxi chʼintl. Qa ma tzʼok tkeʼyina tukʼila ik tzeʼn jun onil teya ex nya ik tzeʼn jun tajqʼoja mlay tzaj «naj tqʼoja» (Eclesiastés 7:9).

¿TIʼ JAKU BʼANT TUʼNA?

• Bʼinkuya aju in tzaj tqʼamaʼn tukʼila teya maske nyaxix bʼaʼn in nela toj twitza

• Tzʼelx tnikʼa tiʼj tiʼ t-xilen ju yol in tzaj tqʼamaʼn teya. Qʼoʼnka twitza tiʼj tzeʼn in tzaj tqʼamaʼn junjun tyol ex tzeʼn tqʼajqʼajel twiʼ tukʼila

¿TIʼ IN TZAJ TQʼAMAʼN TYOL DIOS? «Aju xjal in aqʼnan, at tkambʼabʼl tiʼj jlu, atzunju xjal noq laʼjbʼil nnoʼk tilil tuʼn, noq mebʼayil in tzaj tiʼj» (Proverbios 14:23). Nya oʼkx tuʼn tkanet jun tbʼanel tumel kyuʼne tuʼn kyexe twitz nya bʼaʼn, ax ikx il tiʼj tuʼn tkubʼ bʼinchet. Il-lo tiʼj tuʼn tokxix tilil kyuʼne, noqtzun tuʼnj, nim kʼonil kyiʼje (Proverbios 10:4). Qa ma che aqʼunane junx, «kyjaʼtzun bʼaʼn kʼelel aju aqʼuntl in bʼant» kyuʼne (Eclesiastés 4:9).

¿TIʼ JAKU BʼANT TUʼNA?

• Ximana tiʼj tiʼ jaku bʼant tuʼn teyele junjun kyeye tuʼn tkubʼ naj nya bʼaʼn kyxole

• Aj tbʼet chʼin ambʼil, bʼaʼn tuʼn kyyoline tiʼj jniʼ ma bʼant kyuʼne