Ximana tiʼj techel lu: In pon Karen toj jun ninqʼij. Naʼmxtoq tikʼ nim ambʼil tponlen Karen toj ninqʼij in nok tbʼiʼn jun xjal in xi yolin te aju ojtzqiʼn twitz tuʼn.

In aj meltzʼaj Karen tiʼjxi ex in nok tqʼoʼn twitz tiʼj qa a tamiw Jessica aju qʼiʼn kabʼe botey toj tqʼobʼ. Ojtzqiʼn tuʼn qa tkuʼx qʼeʼn toj. In xi tqʼoʼn Jessica jun botey te Karen ex in xi tqʼamaʼn jlu te: «Nya tzma tal kʼwaʼlxa. Jaku tzalaja jun rat, ¿ax tok?».

Nya tajbʼil Karen tuʼn ttzaj ttzyuʼn botey tuʼnju tzma tal txinx, noqtzun tuʼnj, nya tajbʼil Karen tuʼn tkubʼ t-ximen tamiw qa mintiʼ in tzalaj. Axpe ikx, jun tbʼanel txin te Jessica. Ex qa in kʼan te qʼeʼn, a jlu in tzaj tyekʼun qa bʼaʼn. Tuʼntzunju, in kubʼ t-ximen Karen qa «noq chʼin tal qʼeʼn kxel nkʼane, nya t-xilen jlu qa in chin kʼane droga».

Noqwit aya Karen, ¿tiʼ jaku bʼant tuʼna?

Tuʼn tjaw tjyoʼna alkye mas bʼaʼn, il tiʼj tuʼn tel tnikʼa alkyexix teya ex tiʼ nimen tuʼna. Tukʼil ojtzqibʼil lu, jaku tzʼel tnikʼa tiʼ tajbʼila tuʼn tbʼant tuʼna twitzju tuʼn ttzaj kyqʼamaʼn txqantl tiʼ kbʼantel tuʼna (1 Corintios 9:26, 27).

¿Tiʼ jaku bʼant tuʼna tuʼn tten tipumala ik tzeʼn jlu? Tuʼn t-xi tzyet, bʼaʼn tuʼn ttzaj ttzaqʼweʼna qeju xjel che ul yajxitl.

Qa ma tzʼel tnikʼa tiʼj alkyeqe tiʼchaq tbʼanel in che bʼant tuʼna ok kʼonil tiʼja tuʼn tok qeʼ tkʼuʼja tiʼjxa.

TECHEL TKUʼX TOJ TYOL DIOS: Kubʼ ttzʼibʼin apóstol Pablo jlu: «Maske mya mejor chin yoline, pero nneʼl nnikʼe tiʼj tkyaqil» (2 Corintios 11:6). Tuʼnju attoq tojtzqibʼil apóstol Pablo tiʼj Tyol Dios, mintiʼ tzaj xobʼ tej kyok ten txqantl yolil nya bʼaʼn tiʼj. Mintiʼ xi tqʼoʼn ambʼil kye qeju yol nya bʼaʼn in tzajtoq qʼamaʼn te tuʼn ttzaj bʼaj tkʼuʼj tuʼn (2 Corintios 10:10; 11:5).

XIMANA TI’JA: Ximana tiʼj jun tiʼ tbʼanel in bʼant tuʼna.

Atzun jaʼlo tzʼibʼinkuya jun tbʼanel tmoda at. (Jun techel, qa at tkʼujlabʼila, qa in bʼinchaʼna xtalbʼil, qa jaku tzʼok qeʼ kykʼuʼj txqantl tiʼja moqa in pona toj ambʼil bʼantni tiʼj).

Qa at jun aqwil, moqa las, qʼiʼn tuʼna ex mintiʼ ma tzʼok tqʼoʼn twitza tiʼj qa at jun piẍ chʼix tkubʼ laqj, jaku tzaj nya bʼaʼn tiʼja tuʼn. Axju jaku bʼaj tiʼja qa mintiʼ ojtzqiʼn tuʼna alkyeqe tiʼchaq jun rat in kubʼa kyuʼn, jakulo txi tqʼoʼna ambʼil kye txqantl tuʼn ttzaj kyqʼamaʼn tiʼ kbʼantel tuʼna toj tanqʼibʼila.

TECHEL TKUʼX TOJ TYOL DIOS: Ojtzqiʼntoq tuʼn Pablo aʼyeju tiʼchaq jun rat in kubʼtoq kyuʼn, tuʼntzunju kubʼ ttzʼibʼin jlu: «Porque in chin tzalaje tiʼj Dios tuj wanmiye; pero in nnaʼne juntl ley tuj nximlale in qʼojin tiʼj tley nnabʼle, ex in chin okx presine tuʼn tjaqʼ tley il» (Romanos 7:22, 23).

XIMANA TIʼJA: ¿Alkyeqe junjun tiʼchaq jun rat in kubʼa kyuʼn il tiʼj tuʼn tok t-xqʼuqin tibʼa tiʼj?

¿Jakupe jaxa toj jun taxi ex tuʼn t-xi tqʼamaʼna te chofer tuʼn tok ten qʼol welt toj bʼe ajxi tkubʼ bʼaj tgasolin? A jlu mlay kubʼ qbʼinchaʼn, ex axpe ikx wiʼyilxix.

¿Tiʼ in tzaj t-xnaqʼtzaʼn techel lu qe? Aʼyeju tiʼchaq qaj tuʼn tbʼant quʼn, kʼonil qiʼj tuʼn miʼn qqʼoʼn welt toj qanqʼibʼil. Ojtzqiʼn quʼn jatumel qajbʼil tuʼn qpon ex tiʼ kbʼantel quʼn tuʼn kybʼant.

TECHEL TKUʼX TOJ TYOL DIOS: Kubʼ ttzʼibʼin Pablo jlu: «Kyjaʼtzun weye in chin qelane ik tzaʼn jlu, mintiʼ in chin el takje tiʼj» (1 Corintios 9:26). Kubʼ t-ximen apóstol Pablo tiʼ tajbʼiltoq tuʼn tbʼant tuʼn toj tanqʼibʼil ex ok tilil tuʼn, tuʼn tbʼant, twitzju noq tuʼn tkubʼ ten toj tanqʼibʼil (Filipenses 3:12-14).

XIMANA TIʼJA: Ximana tiʼj oxe tiʼchaq taja tuʼn tbʼant tuʼna toj abʼqʼi lu.

Qa nya qʼuqli tkʼuʼja kyiʼj junjun tiʼchaq, mlayx tzʼok qeʼ tkʼuʼja tiʼj tkyaqil. Kukx kbʼel tchʼixpuʼn tibʼa noq tuʼn ttena kyukʼil tamiwa, ik tzeʼn jun camaleón, aju in kubʼ tchʼexpuʼn tcoloril noq tuʼn tten kyukʼil qeju ateʼ ttxlaj. Aju xjal ik tmod ik tzeʼn jlu, naʼmx tel tnikʼ tiʼjx.

Qa ma kubʼ tbʼinchaʼna ik tzeʼn qe tiʼchaq in nok qeʼ tkʼuʼja tiʼj —noq tiʼxku kbʼantel kyuʼn txqantl moqa kjel kytzaqpiʼn tuʼn tbʼant kyuʼn—, a jlu kʼonil tiʼja tuʼn tel tnikʼa alkyexix teya ex tiʼj alkye qe tiʼchaq in nok qeʼ tkʼuʼja tiʼj.

TECHEL TKUʼX TOJ TYOL DIOS: Maske el paʼn Daniel kyiʼj toj tja tej tzmatoqlo kuʼxin, noqtzun tuʼnj, kubʼ «t-ximan» toj tanmi tuʼn kyxi tnimen qe tkawbʼil Dios (Daniel 1:8). Mintiʼ kubʼ tewin tibʼ Daniel alkyetoq te ex kukx kubʼ tbʼinchaʼn aju qʼuqlitoq tkʼuʼj tiʼj.

XIMANA TIʼJA: ¿Alkyeqe tiʼchaq qʼuqli tkʼuʼja tiʼj? Ximana kyiʼj techel lu: ¿In nokpe qeʼ tkʼuʼja tiʼj Dios? ¿Tiquʼn? ¿Tiʼ o tzʼonin tiʼja tuʼn tok qeʼ tkʼuʼja qa at Dios?

¿In kubʼpe t-ximana qa at kyajbʼen tkawbʼil Dios toj tanqʼibʼila? ¿Tiquʼn in kubʼ t-ximana ikju?

Tuʼntzunju, ¿tzeʼn tajbʼila tuʼn toka: ik tzeʼn jun t-xaq tzeʼ aju in xi tiqin kyqʼiqʼ, moqa ik tzeʼn jun tzeʼ aju in nikʼx nim kyqʼiqʼ jbʼal tuʼn? Qa tajbʼila tuʼn toka ik tzeʼn tzeʼ lu, qʼonka tilil tuʼn tel tnikʼa tiʼj alkyexixa ex alkyeqe tiʼchaq in nok qeʼ tkʼuʼja tiʼj. A jlu kʼonil tiʼja tuʼn t-xi tzaqʼwet xjel lu: ¿Alkye qine?