Ximana tiʼj techel lu: Jun miércoles toj qonikʼe. Ma kubʼ bʼaj taqʼun Geoff, te 17 abʼqʼi, ex in kubʼ t-ximen tuʼn tojlan jun rat tuʼnju nim ma tzʼaqʼunan. In nok tqʼoʼn televisión ex in kubʼ qe tiʼj tqʼuqbʼil mas tgan tiʼj.

Toj ambʼil aju, in pon ttat ttzi ja, ex in qʼojle.

Noqwit a teya Geoff, ¿tiʼwtlo jaku bʼant tuʼna tuʼn tweʼ qʼoj lu?

Qa in yukena tiʼj jun kar ex ma jaw kanet jun tiʼ toj tbʼeya, in xi tjyoʼna juntl bʼe. Axtzun ikx, jaku txi tjyoʼna junjuntl tumel tuʼn tyolina kyukʼil tmana.

 JUN TECHEL:

«Kwest tuʼn nyoline tukʼil nmane —in tzaj tqʼamaʼn Leah—. At maj, in xi nqʼamaʼne jun tiʼ nim toklen te, ex aj tikʼ chʼintl ambʼil, in tzaj tqanin weye: ‹Najsame, ¿in tzajtoq tqʼamaʼna jun tiʼ weye?›».

AT OXE OPCIÓN JAKU BʼANT TUʼN LEAH.

1. Tuʼn t-xi ttzaqʼweʼn tukʼil nya bʼaʼn tmod.

   In jaw ẍchʼin Leah: «¡Nim toklen jlu, tat! ¡Chin tbʼintza!».

2. Tuʼn miʼn t-xi tqʼamaʼn jun tiʼ te.

   Mintiʼ in xi yolin Leah te ex mintiʼ in xi tqʼamaʼn juntl maj te ttat aju nya bʼaʼn in tzaj tiʼj.

3. Tuʼn tjyon juntl ambʼil mas bʼaʼn tuʼn tyolin.

   Toj juntl ambʼil jaku yolin Leah tukʼil ttat moqa jaku txi ttzʼibʼin jun carta te jatumel kxel tqʼamaʼn aju nya bʼaʼn.

¿Alkye kyxol qeju opción jaku txi tqʼamaʼna te Leah tuʼn tkubʼ tbʼinchaʼn?

XIMANA TIʼJ JLU: Ik tzeʼn in nel qnikʼ tiʼj, tok twiʼ ttat Leah tiʼj juntl tiʼ ex mintiʼ in nel tnikʼ tiʼj tiʼ nya bʼaʼn in tzaj kyuʼn qe tyol. Qa ma jaw t-skʼoʼn Leah aju opción A ex qa ma txi ttzaqʼweʼn te tukʼil tqʼajqʼajel twiʼ, mlay tzʼel tnikʼ ttat tiʼj tiquʼn in xi ttzaqʼweʼn Leah te ikju ex mlay tzʼok bʼiʼn tuʼn. Ax ikx, mintiʼ in kubʼ tyekʼun Leah qa in nimen te ttat (Efesios 6:2). Tuʼntzunju, ik tzeʼn in nok tqʼoʼn twitza tiʼj, aju opción lu mintiʼ in nonin.

Jakulo kubʼ t-ximana qa aju opción B mas nya kwest, noqtzun tuʼnj, nya aju mas bʼaʼn. Tuʼnju mas bʼaʼn qa ma txi tqanin onbʼil te ttat. Noqtzun tuʼnj, mlay bʼant tuʼn t-xi tqʼoʼn ttat tconsej qa mintiʼ xi tchikʼbʼaʼn te tiʼ aju in bʼaj tiʼj. Qa mintiʼ ẍe yolin mlayx tzʼel tnikʼ ttat tiʼj.

Atzun opción C, mintiʼ in xi tqʼoʼn Leah ambʼil te jun tiʼ tkubʼ toj tbʼe tuʼn miʼn tbʼant aju tajbʼil. Aju in bʼant tuʼn, in kyaj tqʼoʼn toj juntl ambʼil aju tuʼn tyolin tiʼj tukʼil ttat. Ex qa ma kubʼ ttzʼibʼin jun carta te ttat, maslo bʼaʼn kbʼel tnaʼn tuʼn jlu.

Qa ma kubʼ ttzʼibʼin Leah jun carta te ttat, ok kʼonil tiʼj tuʼn t-xi tchikʼbʼaʼn aju taj tuʼn t-xi tqʼamaʼn. Aj tjaw tuʼjin ttat, ok kʼelel tnikʼ tiʼj tiʼ in tzaj tiʼj Leah. Ax tok, aju opción C atzun mas bʼaʼn kye kykabʼil. Qa ma yolin Leah tukʼil ttat moqa kxel ttzʼibʼin jun carta te, aju opción lu at toklen tukʼilju nabʼil in tzaj tqʼoʼn Tyol Dios lu: «Qo lpeʼk tiʼj ju in tzaj qʼinte qmojbʼabʼl qibʼ qxolx» (Romanos 14:19).

¿Atpe junjuntl tumel jaku bʼant tuʼn Leah?

Ximana qa at jun tiʼ in nul toj twiʼya ex tiʼ jaku tzaj tuʼn jlu.

Naʼntza: qa aju in xi tqʼamaʼna ex aju in kubʼ kyximen tmana tiʼj at junjun maj junxitl in nok toj kywiʼ.

JUN TECHEL:

Qa in tzaj kyqanin tmana teya tiquʼn in qʼojina ex qa ma t-xi ttzaqʼweʼna kye: «Nya waje tuʼn nyoline tiʼj jlu».

Noqtzun tuʼnj, jakulo tzʼel kynikʼ tmana: «Mintiʼxixtl in nok qeʼ nkʼuʼje kyiʼj ntate. Kxel nqʼamaʼne aju nya bʼaʼn in tzaj wiʼje kye wamiwe».

Ximana tiʼj qa ma tzaj tqʼamaʼn tmana teya qa tajbʼil tuʼn tonin tiʼja tukʼil jun nya bʼaʼn in tzaj tiʼja. Noqtzun tuʼnj, in xi ttzaqʼweʼna jlu te: «Mi bʼaj tkʼuʼja, jaku bʼant wuʼne njunalxe».

• ¿Tiʼ jaku tzʼel kynikʼ tmana tiʼj?

• ¿Tiʼ mas bʼaʼn tuʼn t-xi ttzaqʼweʼna?