Ximana tiʼj techel lu: In bʼet David toj jun kojbʼil toj jun qonikʼan qlolj wen, moqa qxopin. Ex tuʼnju qloljxix wen mintiʼ in nel tnikʼ tiʼj jatumel taʼ. Ma tzʼel naj tiʼj tbʼe. Malo tzʼel tzpet tiʼj.

Noqwit aya David, ¿tiʼ jaku bʼant tuʼna?

At nimku tiʼ jaku bʼant tuʼna:

1. Tuʼn t-xi tqanine te jun xjal tuʼn ttzaj tyekʼun teya alkye tten tuʼn tpona jatumel taja tuʼn t-xiʼya.

2. Tuʼn tajbʼen jun txaqbʼil tuʼna.

3. Kukx tuʼn tbʼeta ajxi tkanet bʼe tuʼna jatumel taja tuʼn tpona.

Ax tok, aju opción C atzunju mas nya bʼaʼn.

Mas bʼaʼn chʼintl aju opción B twitzju tnejel. Qa qʼiʼn jun txaqbʼil tuʼna jaku tzʼonin tiʼja tuʼn ttzaj tyekʼun tbʼeya.

Ax ikx te Tyol Dios jaku tzʼonin tiʼja ik tzeʼn techel ma qo yolin tiʼj.

Aju uʼj mas in xi kʼayin:

• Jaku tzʼonin tiʼja aj tok weʼya twitz nim nya bʼaʼn.

• Jaku tzʼonin tiʼja tuʼn tokxix tojtzqiʼn tibʼa ex tuʼn toka te tbʼanel xjal.

• Jaku tzaj tyekʼun teya alkye tten jaku tzʼanqʼina tbʼanel.

Aj tbʼant qyolin, in xi qqanin junjun xjel:

• ¿Tiquʼn azul twitz kyaʼj?

• ¿Tiquʼn in che qoptzʼaj cheʼw?

Yajxitl in xi qqanin junjuntl xjel aj tok qqʼoʼn qwitz tiʼjju at twitz Txʼotxʼ:

• ¿Tiquʼn in tzaj junjun nya bʼaʼn?

• ¿Tiquʼn in qo kyim?

¿Ojtzqiʼn tuʼna qa in tzaj tqʼoʼn Tyol Dios tzaqʼwebʼil kyiʼj xjel lu?

In tzaj kyqʼamaʼn nim xjal qa nojni Tyol Dios tuʼn kyxnaqʼtzbʼil xjal, tuʼn junjun txʼolbʼabʼil, moqa jun ojtxi uʼj, ex qa kwest-xix tuʼn tel qnikʼ tiʼj. Noqtzun tuʼnj, ¿axpe tok jlu? ¿Axpe tok aju in tzaj qʼamaʼn tiʼj Tyol Dios? ¿Moqa nya toj tumel aju in tzaj qʼamaʼn tiʼj?

Jun techel, in kubʼ kyximen xjal qa in tzaj tqʼamaʼn Xjan Uʼj qa a Dios in kawin kyibʼaj xjal twitz Txʼotxʼ. Noqtzun tuʼnj, ¿alkye tten jaku bʼant jlu? At nim nya bʼaʼn twitz Txʼotxʼ. Jaxku tumel at nim yajbʼil ex kʼixkʼoj, yabʼil ex kamik, mebʼayil ex xitbʼil twitz Txʼotxʼ. ¿Jakupe bʼant jlu tuʼn jun Dios at tkʼujlabʼil?

¿Taja tuʼn tel tnikʼa tiʼj alkye in kawin kyibʼaj xjal twitz Txʼotxʼ? Ok kjawil labʼina tiʼj tzaqʼwebʼil in tzaj tqʼoʼn Tyol Dios.

Malo tzʼel tnikʼa qa aʼyeju nabʼil ateʼkux toj uʼj lu atz in che jatz toj Tyol Dios. Qʼuqlixix kykʼuʼj testigos de Jehová qa aju Tyol Dios jun onbʼil aju jaku tzʼok qʼuqeʼ qkʼuʼj tiʼj tuʼnju «a Dios o qʼmante ex at tajbʼen te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl» (2 Timoteo 3:16, 17). Miʼn txi tqʼoʼna ambʼil tuʼn miʼn tel tnikʼa tiʼj uʼj lu, aju ajbʼen toj ambʼil ojtxi ex at tajbʼen toj ambʼil jaʼlo.