Ximana tiʼj techel lu: Mintiʼ in nel tnikʼ Alex tiʼj. Kukx o tzʼok qeʼ tkʼuʼj qa a Dios kubʼ bʼinchante tkyaqilju at. Noqtzun tuʼnj, taj aj xnaqʼtzal te Biología tuʼn t-xi tnimen qa atz tzajni qoʼ kyiʼj maẍ ik tzeʼn in tzaj kyqʼamaʼn aj nabʼil. Nya taj Alex tuʼn tok te jun xjal mintiʼ tnabʼil, ex in kubʼ t-ximen jlu: «Qa ax tok qʼuqli kykʼuʼj aj nabʼil tiʼjju qa atz tzajni qoʼ kyiʼj maẍ, ¿tiquʼntzun junxitl kxel nqʼamaʼne tiʼj jlu?».

Noqwit aya Alex, ¿jakupe txi tnimana aju xnaqʼtzbʼil qa atz tzajni qoʼ kyiʼj maẍ noq tuʼnju in tzaj kyyekʼun uʼj qa ax tok jlu?

At junjun xjal mintiʼ in che ximan tiʼj aj ttzaj kyqʼamaʼn qa in xi kynimen qa atz tzajni qoʼ kyiʼj maẍ moqa at jun bʼinchal tkyaqil, noqtzun tuʼnj, mintiʼ in bʼant tuʼn ttzaj kychikʼbʼaʼn tiquʼn in kubʼ kyximen ikju.

• At junjun xjal in xi kynimen qa at jun bʼinchal tkyaqil noq tuʼnju tzaj xnaqʼtzaʼn kye toj iglesia.

• At junjuntl in nok qeʼ kykʼuʼj tiʼjju qa atz tzajni qoʼ kyiʼj maẍ tuʼnju atzun el kynikʼ tiʼj toj tja xnaqʼtzbʼil.

In tzaj tqʼamaʼn Hebreos 3:4 jlu: «Tkyaqil ja at jun o bʼinchante; pero atzunju o bʼinchante tkyaqil, ate Dios». ¿Tojpe tumel in nela toj twitza aju in tzaj tqʼamaʼn Tyol Dios tzalu?

AJU IN TZAJ KYQʼAMAʼN XJAL: Tkyaqilju at twitz kyaʼj ex twitz Txʼotxʼ bʼant noq tuʼnju el poqʼl jun tiʼ tuʼnx tibʼ, aju ojtzqiʼn kyuʼn xjal ik tzeʼn Big Bang.

AJU IN TZAJ KYQʼAMAʼN XJAL: Atz tzajni qeʼ xjal kyiʼj txkup, moqa jil.

AJU IN TZAJ KYQʼAMAʼN XJAL: Ax tok tzajni qoʼ kyiʼj maẍ.

«Ximana tiʼj qa in bʼeta tjaqʼ tzeʼ ex in nok tqʼoʼn twitza tiʼj jun tbʼanel ja bʼinchaʼn tuʼn tzeʼ. Ax tok mlaylo kubʼ t-ximana jlu: ‹¡Tbʼanelxix! E kubʼlo tzʼaq junjun tzeʼ tzalu ex o bʼant ja lu kyuʼn›. Nya toj tumel jlu. Tuʼntzunju, ¿tiquʼn kxel qnimen qa tkyaqilju at twitz kyaʼj ex twitz Txʼotxʼ tjunalx bʼant?» (chi Julia).

«Qa ma tzaj tqʼamaʼn jun xjal teya qa el poqʼl jun tiʼ toj jun imprenta ex qa aju tinta xiʼ toj tkyaqil plaj ex tiʼj jlu bʼant jun diccionario, ¿jakupe txi tnimana jlu?» (chi Gwen).

In tzaj tqʼamaʼn Tyol Dios tuʼn tajbʼen tnabʼila tuʼna (Romanos 12:1, TNM). Toj juntl yol, qa aju qʼuqbʼil tkʼuʼja nya oʼkx tuʼn tok qeʼ noq tuʼnju:

• IN KUBʼ TNAʼNA: «In kubʼ nnaʼne qa at jun ipumalj mas nim twitz tkyaqil».

• NIMEN KYUʼN TXQANTL: «Kykyaqil xjal at ntxlaje in nok qeʼ kykʼuʼj qa at Dios».

• TAJ JUNTL TUʼN T-XI TNIMANA: «In tzaj kyqʼamaʼn toj njaye weye qa il tiʼj tuʼn tok qeʼ nkʼuʼje qa at Dios».

Nya oʼkx jlu tuʼn tbʼant tuʼna, ilxix tiʼj tuʼn tel tnikʼa tiquʼn in nok qeʼ tkʼuʼja tiʼjju nimen tuʼna.

«Aj ttzaj tchikʼbʼaʼn aj xnaqʼtzal toj tja xnaqʼtzbʼil tiʼj alkye tten in naqʼunan qxmilal, mas in nok qeʼ nkʼuʼje tiʼj qa at Dios. Teyele junjun plaj qxmilal in bʼant jun tiʼ tuʼn, maske mintiʼxix tajbʼen toj qwitz. Chʼixme tkyaqil maj mintiʼ in nok qqʼoʼn qwitz tiʼj alkye tten in naqʼunan qxmilal tojxi. ¡In qo jaw labʼin tiʼj jlu!» (chi Teresa).

«Aj tok nqʼoʼne nwitze tiʼj jun ja matij twaʼlil, jun bark moqa jun kar, in kubʼ nxjeline jlu: ‹¿Alkyetzulo kubʼ bʼinchante?›. Jun techel, il tiʼj tuʼn tten tnabʼil jun xjal aj tkubʼ tbʼinchaʼn jun kar tuʼnju at nimku tiʼchaq tok tiʼj, ex tkyaqil il tiʼj tuʼn tkyaj toj tumel ex tuʼn kyaqʼunaʼn bʼaʼnxix. Tuʼntzunju, qa at jun kubʼ bʼinchante jun kar, ax ikx at jun bʼinchal kye xjal» (chi Richard).

«Tej mastoq in nel nnikʼe tiʼj ciencia, mintiʼxixtoq in xi nnimane qa tzajni qoʼ kyiʼj maẍ. [...] In kubʼ nximane qa il tiʼj tuʼn tten mas qʼuqbʼil qkʼuʼj tuʼntzun t-xi qnimaʼn qa tzajni qoʼ kyiʼj maẍ twitzju tuʼn t-xi qnimaʼn qa at jun Bʼinchal tkyaqilju at» (chi Anthony).

Maske o bʼet nim ambʼil in che jyon qe aj nabʼil tqanil, kukx at junxichaq kyximbʼetz tiʼjju qa tzajni qoʼ kyiʼj maẍ. Axpe ikx kye mintiʼ in ten junx kyximbʼetz tiʼj jlu —ex in tzajtzun kyqʼamaʼn qa at kynabʼil—, ax ikx teya at toklena tuʼn tkubʼ t-xjelina qa ax tok aju xnaqʼtzbʼil lu