Ximana tiʼj techel lu: Aj tok tqʼoʼn Julia twitz tiʼj toj espej, in nok tqʼoʼn twitz tiʼj qa gorda. «Il tiʼj tuʼn tkutz walile» in xi tqʼamaʼn tex, noqtzun tuʼnj, in xi kyqʼamaʼn tamiw ex qe ttat te qa ma tzʼok tiʼj ik tzeʼn jun tzeʼ.

Kʼitzqeku, o tzʼok tilil tuʼn Julia tuʼn tkutz (chʼixme jweʼ libr talil). O che ikʼ junjun qʼij in nikʼx waʼyij tuʼn...

Qa in kubʼ tnaʼna ik tzeʼn te Julia, ¿tiʼ jaku bʼant tuʼna?

Bʼaʼn tuʼnju tajbʼila tuʼn tok t-xqʼuqin t-xmilala. Axpe ikx, in yolin Tyol Dios kyiʼj nim xinaq, moqa ichan, ex xuʼj, moqa qya, tbʼanel che kaʼyin, ik tzeʼn Sara, Raquel, José, David ex Abigail. Ex in tzaj tqʼamaʼn oʼkx tiʼj jun xuʼj, aju Abisag tbʼi qa «tbʼanilxix keʼyin» (1 Reyes 1:4).

Noqtzun tuʼnj, at nim kuʼxin in tzaj bʼajxix kykʼuʼj tiʼj alkye tten che kaʼyin. Tuʼn jlu, jaku tzaj nim nya bʼaʼn kyiʼj. Qo ximen kyiʼj techel lu:

• Toj jun tajlal xnaqʼtzbʼil, el nikʼbʼaj tiʼj qa tiʼj 100 txin 58 in kubʼtoq kyximen qa gorda qe, noqtzun tuʼnj, oʼkx 17 txin otoq jax kyalil.

• Toj juntl tajlal xnaqʼtzbʼil bʼant kyiʼj xuʼj aʼyeju otoq kutz kyalil tzaj tyekʼun qa tiʼj 100 xuʼj 45 in kubʼtoq kyximen qa gorda qe.

• Ateʼ junjun kuʼxin, aʼyeju kyajbʼilxix tuʼn tkutz kyalil o tzaj yabʼil kyiʼj aju anorexia tbʼi, a jlu jun yabʼil tiʼj qnabʼil tuʼn miʼn qwaʼn, aju in xi tiʼn jun xjal tuʼn tkyim tuʼn waʼyij.

 Qa at junjun tiʼ aju in tzaj tyekʼun qa o kubʼ tzʼaqa toj anorexia moqa juntl yabʼil tiʼj tnabʼila tuʼn miʼn twaʼna, miʼn kubʼ t-ximana kabʼe maj, bʼaʼn tuʼn jyona onbʼil. Bʼaʼn tuʼn tyolina jun rat tukʼil ttxuʼya moqa tmana, moqa tukʼil juntl xjal jaku tzʼonin tiʼja. In tzaj tqʼamaʼn Tyol Dios jlu: «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17).

Bʼaʼn tuʼn ttzaj qnaʼn, qa aʼyeju tbʼanel qmod in qo ok kyqʼoʼn te tbʼanel xjal. Qo ximen tiʼj Absalón, aju tkʼwaʼl aj kawil David. In tzaj tqʼamaʼn Tyol Dios jlu tiʼj:

«Mintiʼ juntl xinaq o pon keʼyin ik tzaʼn te [...], kyjaʼtzun kykyaqil xjal in che yolin tiʼj qa puro mejor keʼyin. Tkyaqil t-ximlal mintiʼ chʼin tpaltil at» (2 Samuel 14:25).

Noqtzun tuʼnj, aju kuʼxin lu nim jaw tnimsaʼn tibʼ, pon tkʼuʼj tiʼj nimku tiʼchaq ex ok meltzʼaj tiʼj ttat. Tuʼntzunju, mintiʼ in yolin Tyol Dios tiʼj ik tzeʼn jun tbʼanel xjal, sino in yolin tiʼj ik tzeʼn jun xjal nya bʼaʼn ex nya tzʼaqli, jun xjal nojni toj tanmi tuʼn qʼoj.

Tuʼntzunju, in tzaj tqʼoʼn Tyol Dios qeju nabʼil lu qe:

«Ma tzʼok kyqʼoʼne ju akʼaj kytene kukx tuʼn kyoke te akʼaj» (Colosenses 3:10).

«Aju kyyekʼbʼil kyibʼe myawt aju qʼanchaʼl [...]; noq oʼkx tuʼn kyyekʼunteye aju at tuj kyanmiye» (1 Pedro 3:3, 4).

Bʼaʼn aju tuʼn tok t-xqʼuqin t-xmilala, noqtzun tuʼnj, aju mas nim toklen twitz jlu aʼyeju tbʼanel tmoda. Aj tbʼet ambʼil, aʼyeju tbʼanel tmoda mas tbʼanel che elel toj kywitz txqantl twitzju tuʼn tten jun tbʼanel t-xmilala. «Qa tbʼanel kaʼyina kʼokel kyqʼoʼn txqantl kywitz tiʼja. Noqtzun tuʼnj, aʼyeju tiʼchaq tiquʼn ktzajel naʼna kyuʼn txqantl nya tuʼnju tbʼanel kaʼyina sino kyuʼn qe tbʼanel tmoda», chi jun txin Phylicia tbʼi.

¿Tgana tzeʼn kaʼyin t-xmilala?

¿Ope kubʼ t-ximana tuʼn tbʼant dieta tuʼna tuʼn tok t-xmilala te tbʼanel?

¿Tiʼ jaku kubʼ tchʼixpuʼna tiʼj t-xmilala noqwit jaku bʼant tuʼna? (Jaku kubʼ t-sqitina).

• TWAʼLILA

• TALILA

• TTZMAL TWIʼYA

• T-XMILALA

• TWITZA

• TCHIBʼJAL TWITZA

Bʼalo ma txi ttzaqʼweʼna ax tok kyiʼj qeju kabʼe tnejel xjel ex malo jaw tjyoʼna jun moqa kabʼe tiʼ tiʼjju toxin xjel, noqtzun tuʼnj, at jun tiʼ mintiʼ bʼiʼn tuʼna. Qajlo nya ik tten in nok kaʼyina kyuʼn txqantl ik tzeʼn teya in nok tkaʼyin tibʼa. Qajlo nya ik tten in nok kaʼyina kyuʼn txqantl ik tzeʼn teya in nok tkaʼyin tibʼa. Bʼaʼn tuʼn ttzaj tnaʼna qa jakulo kubʼ qximen aju nya ax tok qiʼjx ex tuʼn jlu jaku tzaj bʼajxix qkʼuʼj tiʼjju tzeʼn qo kaʼyin (1 Samuel 16:7).