¿Ojtzqiʼn tuʼna alkyeqe xjal ateʼkux toj tilbʼilal?... A Mateo, Marcos, Lucas, Juan, Pedro, Santiago, Judas ex Pablo. Aʼyeju xjal lu e anqʼin chʼixme tojx ambʼil tej tanqʼin Jesús ex kubʼ kytzʼibʼen aju ikʼ toj tanqʼibʼil Jesús. Qo xnaqʼtzan chʼintl kyiʼj xjal lu.

Aʼyeju oxe ajtzʼibʼil, apóstolqe ex e pakbʼan tukʼe Jesús. ¿Ojtzqiʼn tuʼna alkyeqe oxe apóstol lu?... A Mateo, Juan ex Pedro. Ojtzqiʼnxix Jesús tuʼn apóstol Mateo ex tuʼn apóstol  Juan, ex teyele te junjun kubʼ ttzʼibʼen jun uʼj aju in yolin tiʼjju ikʼ toj tanqʼibʼil Jesús. Ax ikx kubʼ ttzʼibʼen apóstol Juan jun uʼj aju Apocalipsis, moqa Revelación, tbʼi ex kubʼ ttzʼibʼen oxetl uʼj aju 1 Juan, 2 Juan ex 3 Juan kybʼi. Ax ikx te apóstol Pedro kubʼ ttzʼibʼen kabʼe uʼj aʼyeju ateʼkux toj Tyol Dios. Aju tok kybʼi 1 Pedro ex 2 Pedro. Toj tkabʼ uʼj kubʼ ttzʼibʼen Pedro, kubʼ ttzʼibʼen aju tej ttzaj yolin Jehová toj kyaʼj ex tqʼama jlu tiʼj Jesús: «Atzun Nkʼwaʼle jlu kʼujlaʼnxix wuʼne, in chin tzalaje tiʼj».

Aʼyeju kabʼetl xjal ateʼkux toj tilbʼilal ax ikx teyele te junjun kubʼ ttzʼibʼen jun uʼj aju in yolin tiʼj Jesús. A Marcos jun kyxol qe jlu. Attoqlo Marcos tej t-xi qʼiʼn Jesús kyuʼn ajqʼoj ex ok tqʼoʼn twitz tiʼj tkyaqilju ikʼ. Aju juntl, a Lucas. Jun ajqʼanil te ex okle te okslal (nimel) tej otoqxi kyim Jesús.

Aʼyeju kabʼetl xjal ateʼkux toj tilbʼilal titzʼin Jesús qe ex teyele te junjun kubʼ ttzʼibʼen jun uʼj toj Tyol Dios. ¿Bʼiʼn tuʼna tiʼ kybʼi?... Santiago tbʼi jun ex Judas tbʼi juntl. Tnejel mitiʼ ok qʼuqeʼ kykʼuʼj tiʼj Jesús. Axpe ikx kubʼ kyximen qa otoq tzʼok Jesús te loc. Noqtzun tuʼnj, tej tbʼet ambʼil ok qʼuqeʼ kykʼuʼj tiʼj Jesús ex e ok te okslal.

Aju juntl xjal tkuʼx toj tilbʼilal, aju kubʼ ttzʼibʼen junjuntl uʼj toj Tyol Dios, Pablo tbʼi. Tej naʼmxtoq tok te okslal, Saulo tbʼi. Ikʼentoq kywitz okslal tuʼn ex ok tbʼinchen nya bʼaʼn kyiʼj. ¿Ojtzqiʼn tuʼna tiʼ onin tiʼj Pablo tuʼn tok te okslal?... Jun qʼij tej in bʼet Pablo tuʼn tpon toj Damasco, noq minabʼen xi tbʼiʼn Pablo jun tqʼajqʼajel wibʼaj toj kyaʼj. ¡A Jesús tzaj yolin! Tzaj tqanin te Pablo: ‹¿Tiquʼn in nok tbʼinchaʼna nya bʼaʼn kyiʼj qeju in nok qʼuqeʼ kykʼuʼj wiʼje?›. Tej tikʼ jlu, chʼexpaj t-ximbʼetz Pablo ex ok te jun okslal. Kubʼ ttzʼibʼen Pablo 14 uʼj kyiʼj qeju ateʼkux toj Tyol Dios, in xi tzyet tiʼj Romanos in pon bʼaj tiʼj Hebreos.

¿Bʼaʼnpe tuʼn tkubʼ quʼjin Tyol Dios tkyaqil qʼij?... Tbʼanel, tuʼnju qa ma kubʼ quʼjin Tyol Dios ok kʼelel qnikʼ tiʼj Jesús. ¿Taja tuʼn tel mastl tnikʼa tiʼj Jesús?...