¿Kwest in nela toj twitza tuʼn tkubʼ tbʼinchaʼna aju bʼaʼn?... Chʼixme kykyaqil xjal kwest in nela toj kywitz. In tzaj tqʼamaʼn Tyol Dios qa mas kwest ela toj twitz jun qʼa aju Josías tbʼi tuʼn tkubʼ tbʼinchen aju bʼaʼn. Noqtzun tuʼnj, e ten tbʼanel tamiw aʼyeju e onin tiʼj. Qo yolin chʼin tiʼj Josías ex kyiʼj tamiw.

Amón tbʼi ttat Josías, aju ajkawil toj tnam Judá. Nya bʼaʼn xjaltoq Amón ex in najbʼen kye junjuntl dios. Tej tkyim ttat Josías, atl Josías ok te kawil toj tnam Judá. Ex oʼkx 8 abʼqʼi iqʼin tuʼn. ¿Ok Josías te nya bʼaʼn xjal ik tzeʼn ttat?... Mitiʼ.

Tej tzmatoq qʼax Josías, tajtoq tuʼn tnimen te Jehová. Tuʼntzun jlu, e jaw tjyoʼn tamiw aʼyeju kʼujlaʼn Jehová kyuʼn. Ex e onin tiʼj Josías tuʼn tkubʼ tbʼinchaʼn aju bʼaʼn. ¿Alkyeqe junjun tamiw Josías e ten?

A Sofonías jun kyxol qeju e ok te tamiw Josías. Jun t-sanjel Dios te Sofonías, aju xi tqʼamaʼn kye xjal te Judá qa tzul nya bʼaʼn kyiʼj qa in che ajbʼen kye junjuntl dios.  Okx tbʼiʼn Josías aju tzaj tqʼamaʼn Sofonías ex atz ajbʼen te Jehová, ex nya kye junjuntl dios.

A Jeremías juntl tamiw Josías ok. Chʼixmilo junxtoq tabʼqʼi Jeremías tukʼe Josías ex nqatoq (qaynitoq) taʼ tja jun tiʼj tja juntl tej kytzaj chʼiy. Kyamiwxixtoq kyibʼ Josías tukʼe Jeremías, tuʼntzunju, tej tkyim Josías kubʼ ttzʼibʼin Jeremías jun tbʼanel bʼitz tiʼjju bʼis tnaʼ tiʼj Josías. Onin Jeremías tiʼj Josías ex onin Josías tiʼj Jeremías tuʼn tkubʼ kybʼinchaʼn aju bʼaʼn ex aju tzaj tqʼamaʼn Jehová kye.

¿Tiʼ jaku tzʼel tkanoʼna tiʼj techel kyaj tqʼoʼn Josías?... Tej tal qʼa Josías, tajtoq tuʼn tkubʼ tbʼinchaʼn aju tzaj tqʼamaʼn Dios. Ojtzqiʼntoq tuʼn qa il tiʼj tuʼn kyjaw tjyoʼn tamiw aʼyeju kʼujlaʼn Jehová kyuʼn. Qʼuqli qkʼuʼje qa ok che jawil tjyoʼn tamiwoya aʼyeju kʼujlaʼn Jehová kyuʼn ex aʼyeju ok che onil tiʼja tuʼn tkubʼ tbʼinchaʼna aju bʼaʼn.