¿Kwest in nela toj twitza tuʼn kyxi tbʼiʼn ttata?... At maj kwest. ¿Tzeʼn teya toj twitz? ¿Xi tbʼiʼn Jesús Jehová ex qe ttat?... Aju techel kyaj tqʼoʼn Jesús jaku tzʼonin tiʼja tuʼn kyokx tbʼiʼn ttata axpe ikx qa at maj kwest in nela toj twitza. Qo xnaqʼtzan chʼintl tiʼj.

Tej naʼmxtoq tul Jesús twitz Txʼotxʼ, anqʼin tukʼe tTat, aju Jehová, atz toj kyaʼj. Noqtzun tuʼnj, ax ikx e ten ttat tzalu twitz Txʼotxʼ. José ex María kybʼi. ¿Ojtzqiʼn tuʼna alkye tten e ok te ttat?...

Ok tqʼoʼn Jehová tchwinqlal Jesús toj talbʼil María tuʼn tul itzʼji ex tuʼn tanqʼin twitz Txʼotxʼ. Jun milagro aju bʼant tuʼn Jehová. Chʼiy Jesús toj talbʼil María ik tzeʼn in che chʼiy tal neʼ toj talbʼil kynan. Tej tikʼ junlo 9 xjaw (qyaʼ), ul itzʼji Jesús. Iktzun tten ok María te tnan Jesús ex ok José, aju tchmil María, te ttat Jesús tzalu twitz Txʼotxʼ.

Tej oʼkx 12 abʼqʼi iqʼin tuʼn Jesús, bʼant jun tiʼ tuʼn aju kubʼ tyekʼun qa at-xix tkʼuʼj tiʼj tTat, aju Jehová. Ikʼ jlu tej t-xiʼ Jesús kyukʼex toj tja tzmax Jerusalén tuʼn kyten toj Xjan Qʼij. Tej otoq che ajtz meltzʼaj José ex María tuʼn kypon kyja, e ok ten jyolte Jesús ex mitiʼ kanet kyuʼn. ¿Bʼiʼn tuʼna jatumel taʼtoq Jesús?...

E aj meltzʼaj naj juntl maj José tukʼe María toj Jerusalén ex e ok ten jyolte Jesús jaʼxku tumel. Tzaj bʼajxix kykʼuʼj tuʼnju mitiʼ kanet kyuʼn. Tej otoqxi tzikʼ oxe qʼij, ¡kanet kyuʼn toj tja Dios! ¿Ojtzqiʼn tuʼna tiquʼn atztoq taʼ Jesús toj tja Dios?... Tuʼnju atztoq jaku tzʼel tnikʼ tiʼj tTat, aju Jehová. Kʼujlaʼntoq Jehová tuʼn ex tajtoq tuʼn tel tnikʼ tiʼj alkye tten tuʼn ttzalaj Jehová tuʼn. Tej tchʼiy Jesús, tkyaqil maj xi tbʼiʼn aju tzaj tqʼamaʼn Jehová te, axpe ikx xi tnimen Jesús Jehová tej kwest ela toj twitz ex tej tok bʼinchaʼn nya bʼaʼn tiʼj. ¿Ax ikx kukxpe e okx tbʼiʼn Jesús José ex María?... Ikju, in tzaj tqʼamaʼn Tyol Dios qa e okx tbʼiʼn.

¿Tiʼ jaku tzʼel tkanoʼna tiʼj techel kyaj tqʼoʼn Jesús?... Aju qa ax ikx teya il tiʼj tuʼn kyxi tbʼiʼn ttata, axpe ikx qa kwest sela toj twitza. ¿Okpe che xel tbʼiʼn ttata?...