At maj in che xmayin xjal qiʼj moqa in tzaj kyqʼoj qiʼj aj qyolin tiʼj Jehová. Tuʼn jlu jaku kubʼ qximen tuʼn miʼn qyolintl tiʼj Dios. ¿O kubʼ t-ximinxi teya ikju?... In yolin Tyol Dios tiʼj jun kuʼxin aju kʼujlaʼn Jehová tuʼn, noqtzun tuʼnj, chʼixmi kyaj ttzaqpiʼn tuʼn tyolin tiʼj Jehová. Jeremías tbʼi. Qo xnaqʼtzan chʼin tiʼj.

Tej tzmatoq qʼax Jeremías, xi tqʼamaʼn Jehová te tuʼn t-xi tqʼamaʼn kye xjal tuʼn tkyaj kytzaqpiʼn aju nya bʼaʼn in kubʼ kybʼinchaʼn. Kwest ela jlu toj twitz Jeremías ex tzaj xobʼ. Xi tqʼamaʼn jlu te Jehová: «Ay Tat, ma kʼwaʼlx qine ex mlay bʼant nyoline». Atzunte Jehová tzaj tqʼamaʼn jlu te: «Miʼn xobʼa kywitz xjal, porque aqine chin tel tukʼila te klol teya».

 Tuʼntzun jlu, xi tzyet tuʼn t-xi tqʼamaʼn Jeremías kye xjal qa ok kbʼel qʼoʼn kykastiw qa mitiʼ xkubʼ kychʼexpuʼn kybʼinchbʼen. ¿Kubʼpe kybʼinchen xjal aju xi tqʼamaʼn Jeremías kye?... Mitiʼ. E ok ten xmayil tiʼj ex tzaj kyqʼoj tiʼj. Axpe ikx at junjun kyajtoq tuʼn tkubʼ kybʼiyoʼn. ¿Tiʼtzulo tnaʼ Jeremías?... Tzaj xobʼ ex tqʼama jlu: «Miʼn chin yolintle tiʼj» Jehová. ¿Kyajpe ttzaqpiʼn tuʼn tyolin?... Mitiʼ. Tuʼnju kʼujlaʼnxix Jehová tuʼn. Ex tuʼnju mitiʼ kyaj ttzaqpiʼn tuʼn tyolin tiʼj Jehová, kukx kolin Jehová tiʼj.

Jun techel tiʼj jlu, kux xoʼn Jeremías kyuʼn junjun nya bʼaʼn xjal toj jun jul aju sobʼan toj. Ex mitiʼ xi kyqʼoʼn twa ex tkʼaʼ. Kyajtoq xjal lu tuʼn tkyim Jeremías toj jul. Noqtzun tuʼnj, onin Jehová tiʼj ex klet tuʼn.

¿Tiʼ jaku tzʼel tkanoʼna tiʼj techel kyaj tqʼoʼn Jeremías?... Axpe ikx tej ttzaj xobʼ Jeremías junjun maj, mitiʼ kyaj ttzaqpiʼn tuʼn tyolin tiʼj Jehová. Aj tyolina tiʼj Jehová, jaku che ok ten xjal xmayil tiʼja moqa jaku tzaj kyqʼoj tiʼja. Jakule tzaj tchʼixwiya moqa jaku tzaj xobʼa tuʼn jlu. Noqtzun tuʼnj, miʼn kyaj ttzaqpiʼna tuʼn tyolina tiʼj Jehová. Kukx ktzajel onina tuʼn, ik tzeʼn bʼant tuʼn tukʼe Jeremías.