¿Tiʼ teya in bʼant tuʼn qa ma tzaj xobʼa?... Jakulo txiʼya tukʼe tnana ex tukʼe ttata tuʼn ttzaj onina kyuʼn. Noqtzun tuʼnj, ax ikx at juntl jaku tzaj onin teya. Mas at tipumal twitz alkyexku juntl. ¿Ojtzqiʼn tuʼna alkye?... Ikju, a qMan Jehová. Qo yolin chʼin tiʼj jun qʼa aju David tbʼi toj Tyol Dios. Tuʼnju ojtzqiʼntoq tuʼn qa kukx ktzajel onin tuʼn Jehová, mitiʼ tzaj xobʼ.

Atxix tej tal neʼ David, kubʼ xnaqʼtzaʼn kyuʼn ttat tuʼn tten tkʼuʼj tiʼj Jehová. A jlu onin tiʼj David tuʼn miʼn ttzaj xobʼ, axpe ikx tej tok weʼ twitz junjun nya bʼaʼn. Ojtzqiʼntoq tuʼn David qa a Jehová tamiw ex qa jaku tzaj onin tuʼn. Toj jun maj, tej in xqʼuqin kyiʼj junjun ẍneʼl, moqa rit, pon jun matij (nin, nim) león ex xi tiʼn jun ẍneʼl. ¿Bʼiʼn tuʼna tiʼ bʼant tuʼn David? ¡Xi lepeʼ tiʼj león ex kubʼle tbʼiyoʼn tukʼe tqʼabʼ! Ex tej tok lipen jun oso kyiʼj ẍneʼl, ¡ax ikx kubʼ tbʼiyoʼn David oso! ¿Alkye onin tiʼj David?... Ikju, a Jehová.

Qo xnaqʼtzan tiʼj juntl ambʼil atz jatumel mitiʼ tzaj xobʼ David. Ok jun qʼoj kyxol aj Israel kyukʼe aj Filistea. At jun kysoldad aj Filistea aju nimxix tweʼ, aju Goliat tbʼi. In xmayintoq Goliat kyiʼj soldad te tnam Israel ex tiʼj Jehová. In xitoq tqʼamaʼn kye soldad te tnam Israel tuʼn kyxiʼ qʼojil tiʼj. Noqtzun tuʼnj, kykyaqil aj Israel nimxix e tzaj xobʼ tuʼn kyxiʼ qʼojil tukʼe. Tej tok tbʼiʼn David jlu, xi tqʼamaʼn te Goliat qa ok kyqʼojel tukʼe ex xi tqʼamaʼn jlu te: «Jaʼlo ate Dios ktzajel qʼonte teya tuj nqʼabʼe tuʼn tkubʼ tiʼja wuʼne». ¿Tzajpe xobʼ David?... Ikju, mitiʼx tzaj xobʼ. ¿Taja tuʼn tel tnikʼa tiʼj tiʼ bʼaj yajxitl?

Xi tiʼn David jun xobʼl abʼj ex xi tiʼn jweʼ abʼj tzʼumin (liso) kyiʼj tuʼn t-xiʼ qʼojil tukʼe Goliat. Tej tok tqʼoʼn Goliat twitz tiʼj qa tzmatoq qʼax David, ok ten xmayil tiʼj David. Atzunte David xi tqʼamaʼn jlu te: «Ma tzaja wiʼje tukʼil spad [...], atzun weye chin okel tzoqpaje tiʼja tuj tbʼi Dios», aju Jehová. Kuxtzun tqʼoʼn David jun abʼj toj t-xobʼl, xi ojqelan, moqa xi rinin, ex xi t-xoʼn abʼj tiʼj Goliat. ¡Bʼiʼx okx abʼj tibʼaj  twitz Goliat! Kubʼ tzʼaq twitz txʼotxʼ, ex kyim. E tzaj xobʼ soldad te Filistea ex kykyaqil i el oq. ¿Tiquʼn kyim jun xjal nimxix twaʼl tuʼn jun qʼa ik tzeʼn David?... Onin Jehová tiʼj, ex mas attoq tipumal Jehová twitzju xjal nimxix tweʼ.

¿Tiʼ xnaqʼtzbʼil in tzaj tqʼoʼn teya aju ikʼ tiʼj David?... Qa a Jehová mas at tipumal twitz alkyexku juntl. Ex qa a Jehová tamiwoya. Tuʼntzunju, qa ma tzaj xobʼa, bʼaʼn tuʼn ttzaj tnaʼna qa jaku tzaj onina tuʼn Jehová tuʼn miʼn ttzaj xobʼa.