Qo xnaqʼtzan tiʼj jun kuʼxin aju onin tuʼn miʼn tkyim t-xibʼen tnan. Atoq apóstol Pablo t-xibʼin tnan kuʼxin lu. Mitiʼ ojtzqiʼn tbʼi kuʼxun lu quʼn, noqtzun tuʼnj, ojtzqiʼn quʼn qa mitiʼ tzaj xobʼ tej tbʼant jun tiʼ tuʼn. ¿Taja tuʼn tok tbʼiʼna tiʼ bʼant tuʼn?...

Prestoq taʼ Pablo toj tnam Jerusalén. Okx jupuʼn tuʼnju in yolintoq tiʼj Jesús. Noqtzun tuʼnj, at junjun xjal ikʼen twitz Pablo kyuʼn ex bʼaj kyximen alkye tten tuʼn tkubʼ kybʼiyoʼn. Kyqʼama jlu: «Kyqaninxe te coronel tuʼn ttzaj qʼiʼn Pablo kywitze nchiʼj, chebʼa tuʼn qyoline tiʼj alkye til, che chikuye; atzun qeye list qo bʼel tene tuʼn tkubʼ qbʼyoʼne naʼnxtoq tkanun kyukʼile».

Ok tbʼiʼn t-sobrin Pablo aju kubʼ kyximen nya bʼaʼn xjal lu. ¿Tiʼ bʼant tuʼn t-sobrin Pablo? Xiʼ atz jatumel jupuʼnkx Pablo ex xi tqʼamaʼn te aju otoq tzʼok tbʼiʼn. Xi tqʼamaʼn naj Pablo te tuʼn t-xi tqʼamaʼn jlu te nejenel kye soldad. ¿Kwestpe ela toj twitz t-sobrin Pablo tuʼn tyolin tukʼe nejenel kye soldad?... Kwest ela toj twitz, tuʼnju nim toklen nejenel kye soldad. Noqtzun tuʼnj, mitiʼ tzaj xobʼ ex xiʼ yolil tukʼe nejenel kye soldad.

Elxix tnikʼ nejenel kye soldad tiʼtoq tuʼn tbʼant tuʼn. I ex t-samaʼn junlo 500 soldad tuʼn tok kyxqʼuqin Pablo. Xi tqʼamaʼn kye tuʼn t-xi kyiʼn Pablo tuʼn tpon toj Cesarea toj qonikʼan aju. ¿Bʼaʼnpe pon Pablo?... Bʼaʼn pon, mitiʼ bʼant tuʼn kyok lipen nya bʼaʼn xjal tiʼj. Mitiʼ bʼant aju bʼaj kyximen nya bʼaʼn xjal lu, iktzun tten mitiʼ kyim Pablo.

¿Tiʼ in tzaj tyekʼun xnaqʼtzbʼil lu teya?... Qa ax ikx teya jaku tzʼoka ik tzeʼn t-sobrin Pablo aju mitiʼ tzaj xobʼ. Ilxix tiʼj tuʼn miʼn qtzaj xobʼ aj qyolin kyukʼe txqantl xjal tiʼj Jehová. ¿Kukxpe kyolil teya tiʼj Jehová?... Qa mitiʼ saj xobʼa aj tyolina tiʼj Jehová, ax ikx teya jaku tzʼonina tuʼn kyklet junjun xjal.