XNAQʼTZBʼIL 2
Tajtoq Rebeca tuʼn ttzalaj Jehová
Kʼujlaʼn Jehová tuʼn Rebeca. Isaac tbʼi tchmil. Ax ikx te Isaac kʼujlaʼn Jehová tuʼn. ¿Alkye tten ok tojtzqiʼn Rebeca Isaac? ¿Tzeʼn tten kubʼ tyekʼun Rebeca qa tajtoq tuʼn ttzalaj Jehová tuʼn? Qo xnaqʼtzan chʼintl tiʼj.
Abrahán tbʼi ttat Isaac ex Sara tbʼi tnan. In che anqʼintoq toj tnam Canaán atz jatumel mitiʼ in che ajbʼen xjal te Jehová. Noqtzun tuʼnj, tajtoq Abrahán tuʼn tkubʼ mojeʼ tkʼwaʼl tukʼe jun xuʼj aju in najbʼen te Jehová. Tuʼntzun jlu, xi t-samaʼn Abrahán jun tmajen, ale Eliezer, tuʼn ttzaj tjyoʼn jun xuʼj tuʼn tok te t-xuʼjil Isaac. Xiʼ Eliezer jyolte xuʼj toj jun lugar aju Harán tbʼi, atz jatumel in che anqʼin junjun xjal at kyxilen tukʼe Abrahán.
Tuʼn tkyaqil tkʼuʼj Rebeca aqʼunan wen tuʼn tjatz tiʼn aʼ kye kamey
Kubʼ Eliezer toj bʼe kyukʼex junjuntl tmajen Abrahán. Nimxix xi kybʼetin tuʼn kypon. Xi kyiʼn lajaj kamey tuʼn t-xi kyiqin wabʼj ex oyaj, moqa kotz. ¿Tzeʼn jakutoq tzʼel tnikʼ Eliezer tiʼj alkye xuʼj kjawil tjyoʼn tuʼn tok te t-xuʼjil Isaac? Tej kypon Eliezer kyukʼex junjuntl tmajen Abrahán toj Harán, e weʼ ttziʼ jun xoch tuʼnju ojtzqiʼn tuʼn Eliezer qa chʼixtoq kypon xjal qʼil aʼ. Xi tqanin Eliezer jlu te Jehová: ‹Qa ma txi nqanine te jun txin tuʼn ttzaj tqʼoʼn nkʼaʼye aʼ ex qa ma tzaj tqʼoʼn nkʼaʼye aʼ ex kye qe ncameye, oktzun kʼelel nnikʼe tiʼj qa a txin lu ma jaw tjyoʼna›.
Pontzun Rebeca, aju txin, moqa qʼapoj, ttziʼ xoch. In tzaj tqʼamaʼn Tyol Dios qa tbʼanelxix Rebeca. Xi tqanin Eliezer chʼin tkʼaʼ, moqa tkʼwaʼ, aʼ te ex tzaj ttzaqʼweʼn Rebeca jlu: «Kʼana aʼ tat. [...] Ax ikx kjawitz wiʼne aʼ te kykʼa tcheja Camey». ¡Naqpe ximana tiʼj! In bʼaj nimxix aʼ kyuʼn kamey qa at-xix kʼaj kyiʼj, tuʼntzun jlu, xiʼ Rebeca jun maj ex juntl maj qʼil aʼ toj xoch. ¿Jaku tzʼok tqʼoʼna twitza tiʼj Rebeca toj tilbʼilal, aju in naqʼunanxix wen?... Etz twitz Eliezer tiʼj alkye tten tzaj ttzaqʼweʼn Jehová tnaʼj Dios.
Xi tqʼoʼn Eliezer nim tbʼanel oyaj te Rebeca. Xi txkoʼn Eliezer tuʼn Rebeca kyukʼex junjuntl tmajen Abrahán tuʼn kyxiʼ tja. Xi tqʼamaʼn Eliezer kye toj tja Rebeca tiquʼn otoq pon samaʼn tuʼn Abrahán ex alkye tten otoq tzaj tzaqʼweʼn tnaʼj Dios tuʼn Jehová. Bʼaʼn ela toj kywitz toj tja Rebeca tuʼn tkubʼ mojeʼ Rebeca tukʼe Isaac.
Xiʼ Rebeca toj tnam Canaán tukʼe Eliezer ex kubʼ mojeʼ tukʼe Isaac
¿Tzeʼn teya toj twitz? ¿Tajpetzele te Rebeca tuʼn tkubʼ mojeʼ tukʼe Isaac?... Ojtzqiʼntoq tuʼn Rebeca qa a Jehová otoq pon samante Eliezer. Tuʼntzunju, tej t-xi kyqanin toj tja te qa tajtoq tuʼn t-xiʼ toj Canaán ex tuʼn tkubʼ mojeʼ tukʼe Isaac, tzaj ttzaqʼweʼn jlu: «Ok. Chin xeʼle». Lwey naj e kubʼ toj bʼe tukʼe Eliezer. Tej kypon toj Canaán, kubʼ mojeʼ Rebeca tukʼe Isaac.
Tuʼnju kubʼ tbʼinchaʼn Rebeca aju tajbʼil Jehová, tzaj kʼiwlaʼn tuʼn Jehová. Tej tikʼ nim abʼqʼi, ¡atz ul itzʼji Jesús kyiʼj toj tja Rebeca! Qa ma tzʼoka ik tzeʼn Rebeca ex qa ma tzalaj Jehová tuʼna, ax ikx teya ok ktzajel kʼiwlaʼna tuʼn Jehová.
