XNAQʼTZBʼIL 13
Tajtoq Timoteo tuʼn tonin kyiʼj xjal
Aju kuʼxun Timoteo o tzalaj tej tonin kyiʼj xjal. Bʼet kyoj nimku tnam tuʼn tonin kyiʼj txqantl. Tuʼnju bʼant jlu tuʼn, o tzalajxix toj tanqʼibʼil. ¿Taja tuʼn tok tbʼiʼna chʼintl tqanil tiʼj Timoteo?...
Xi xnaqʼtzaʼn Timoteo tiʼj Jehová tuʼn tnan ex tuʼn tyaʼ
Atz jaw chʼiy Timoteo toj jun tnam Listra tbʼi. Atxix tej tal kʼwaʼl Timoteo xi qʼoʼn xnaqʼtzbʼil te tiʼj Jehová tuʼn tyaʼ aju Loida tbʼi ex tuʼn tnan aju Eunice tbʼi. Tej tchʼiy, tajtoq tuʼn tonin kyiʼj xjal tuʼn tel kynikʼ tiʼj Jehová.
Tej qʼax Timoteo, xi tqanin Pablo te qa jaku txiʼ pakbʼal tukʼe kyoj junjuntl tnam. Xi ttzaqʼweʼn Timoteo qa jaku. Otoq bʼant tten tuʼn t-xiʼ ex tuʼn tonin kyiʼj txqantl.
Xiʼ Timoteo tukʼe Pablo toj jun tnam te Macedonia aju Tesalónica tbʼi. Tuʼn kypon toj tnam lu, iltoq tiʼj tuʼn t-xi kybʼetin nim ex tuʼn kyxiʼ toj jun bark. Tej kypon, e onin kyiʼj nimku xjal tuʼn tel kynikʼ tiʼj Jehová. Noqtzun tuʼnj, at junjun xjal tzaj kyqʼoj ex kyajtoq tuʼn tok kybʼinchen nya bʼaʼn kyiʼj. Tuʼntzunju, e ikʼ bʼet Pablo tukʼex Timoteo ex i eʼx pakbʼal kyoj junjuntl tnam.
Tzalajxix Timoteo toj tanqʼibʼil
Tej tikʼ junjun xjaw, xi tqʼamaʼn Pablo te Timoteo tuʼn tmeltzʼaj juntl maj toj Tesalónica tuʼn tok tqʼoʼn twitz kyiʼj erman qa bʼaʼn ateʼqe. Noqtzun tuʼnj, tuʼnju otoq che ok lipenxi junjun xjal te Tesalónica kyiʼj okslal, ¡iltoq tiʼj tuʼn miʼn ttzaj xobʼ Timoteo tuʼn tmeltzʼaj juntl maj toj tnam lu! ¿Tiʼ bʼant tuʼn Timoteo? Xiʼx toj Tesalónica tuʼnju tzaj bʼaj tkʼuʼj kyiʼj erman toj tnam aju. Tzaj tiʼn Timoteo tbʼanel tqanil tej tmeltzʼaj juntl maj tukʼe Pablo. Bʼaʼnxix ateʼtoq erman toj Tesalónica.
Aqʼunan Timoteo tukʼe Pablo toj nim abʼqʼi. Toj jun maj, kubʼ ttzʼibʼen apóstol Pablo qa tbʼanel xjal te Timoteo aju jaku txi t-samaʼn tuʼn tonin kyiʼj erman kyoj txqantl Ja te Chmabʼil tuʼnju kʼujlaʼntoq Jehová ex qe xjal tuʼn.
¿At teya tkʼuʼj kyiʼj xjal ex taja tuʼn tonina kyiʼj tuʼn tel kynikʼ tiʼj Jehová?... Qa ikju, ax ikx teya nim ok ktzalajela toj tanqʼibʼila ik tzeʼn te Timoteo.
