XNAQʼTZBʼIL 7
¿Tiʼ jaku bʼant tuʼna qa ma tzaj xobʼa ex qa tjunalxa at?
Qʼoʼnk twitza tiʼj tal kʼwaʼl at toj tilbʼilal. Tjunalx at ex in xobʼ. ¿O tnaʼxi teya jlu?... Qkyaqilx at maj in qnaʼn jlu. In yolin Tyol Dios kyiʼj junjun tamiw Jehová aʼyeju ax ikx kynaʼ qa kyjunalx ateʼtoq ex e tzaj xobʼ. Jun kyxol qe jlu, a Elías. Qo xnaqʼtzan chʼin tiʼj.
Tajtoq Jezabel tuʼn tkubʼ tbʼiyoʼn Elías
Anqʼin Elías toj tnam Israel tej atxtoq nim ambʼil tuʼn tul itzʼji Jesús. Atoq Acab ajkawil toj Israel ex mitiʼtoq in najbʼen te Jehová, aju axix tok Dios. In najbʼentoq Acab tukʼex t-xuʼjil, aju Jezabel tbʼi, te nya ax tok (nya bʼaʼn ax) dios Baal. Tuʼntzun jlu, ax ikx chʼixmi kykyaqil xjal toj Israel e ok ten ajbʼel te Baal. Puro nya bʼaʼn xuʼj ajkawil Jezabel ex tajtoq tuʼn tkubʼ tbʼiyoʼn kykyaqil qeju in che ajbʼen te Jehová. Ex tuʼnju in ajbʼentoq Elías te Jehová, ¡ax ikx tajtoq Jezabel tuʼn tkubʼ tbʼiyoʼn Elías! ¿Ojtzqiʼn tuʼna tiʼ bʼant tuʼn Elías?...
Xi oq Elías najchaq, moqa laqʼche. Xiʼ toj tzqij txʼotxʼ ex okx tewin tibʼ toj jun jul. ¿Tiquʼn okx tewin tibʼ Elías?... Ikju, tuʼnju tzaj xobʼ. Noqtzun tuʼnj, nya iltoq tiʼj tuʼn ttzaj xobʼ Elías. ¿Tiquʼn? Tuʼnju ojtzqiʼntoq tuʼn qa jaku tzaj onin tuʼn Jehová. Otoqxi tzʼok tqʼoʼn twitz Elías tiʼj qa at nim tipumal Jehová. Toj jun maj, tzaj ttzaqʼweʼn Jehová tnaʼj Dios Elías tej ttzaj t-samaʼn qʼaqʼ toj kyaʼj. Ax ikx toj ambʼil lu, jaku tzaj onin Elías tuʼn Jehová.
¿Alkye tten onin Jehová tiʼj Elías?
Tej tokx Elías toj jul, tzaj yolin Jehová tukʼil ex tzaj tqanin jlu te: «¿Ti in bʼaj teya tzalu?». Xi ttzaqʼweʼn Elías jlu: «Oʼkx qine ma chin kyaj ten» ajbʼel teya, «ex lu in che jyon wiʼje tuʼn nkubʼ bʼyoʼne kyuʼn». Kubʼ t-ximen Elías qa otoq che kubʼ bʼiyoʼn kykyaqil ajbʼel te Jehová. Noqtzun tuʼnj, tzaj tqʼamaʼn Jehová te Elías qa nya ik ttenju, ex qa atx «wuq mil xjal kyxol aj Israel» miti e «kubʼ ẍmejeʼ twitz Baal». Ax ikx tzaj tqʼamaʼn Jehová te tuʼn miʼn ttzaj xobʼ, ex qa kxel tqʼoʼn mastl taqʼun. ¿Jawpe tzalaj Elías tej tok tbʼiʼn jlu?...
Ximena tiʼjju ikʼ tiʼj Elías. ¿Tiʼ in tzaj tyekʼun jlu teya?... In tzaj tyekʼun qa at maj jaku tzaj xobʼa ex jaku tnaʼya qa mix aʼl jun at tukʼila. Noqtzun tuʼnj, bʼaʼn tuʼn ttzaj tnaʼna qa ateʼqe tamiwoya aʼyeju at kykʼuʼj tiʼj Jehová ex at kykʼuʼj tiʼja. Ax ikx miʼn tzikʼ tnaʼl tuʼna qa at nimxix tipumal Jehová, ex kukx ktzajel onina tuʼn. ¿In tzalajpe teya tuʼnju ma tzʼel tnikʼa tiʼj qa nya tjunalxa at?...
