Aqeye erman:

In nonin qkʼujlabʼil at tiʼj Dios ex kyiʼj xjal tuʼn t-xi qbʼiʼn kawbʼil lu: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, ex tuʼn kybʼyan» (Mat. 28:19, 20; Mar. 12:28-31). Aju kʼujlabʼil axix tok, at nim tipumal ex jaku pon toj kyanmi «qeju skʼoʼmaj tuʼn tten kychwinqlal te jumajx» (Hech. 13:48).

Ojtxe in noktoq tilil quʼn tuʼn tkyaj junjun yekʼbʼil toj qwiʼ aj qyolin kyukʼil xjal ex tuʼn tkyaj qqʼoʼn junjun uʼj kye. Pero toj ambʼil jaʼlo, il tiʼj tuʼn tbʼant junjun chʼixpubʼil quʼn aj t-xi tzyet tuʼn qyolin kyukʼil xjal. In kubʼ qyekʼin qkʼujlabʼil kyiʼj qa ma qo yolin kyukʼil tiʼj jun xnaqʼtzbʼil kygan. Teyele te junjun xjal junxichaq tmod ex t-ximbʼetz. Tuʼntzunju, nim toklen tuʼn tel qnikʼ tiʼjju tgan xjal tuʼn tyolin tiʼj ex tiʼjju in tzaj bʼaj tkʼuʼj tiʼj. ¡O bʼaj bʼinchaʼn uʼj lu tuʼn tbʼant jlu quʼn!

Toj folleto lu at 12 xnaqʼtzbʼil in yolin tiʼj 12 mod, aʼyeju che onil qiʼj tuʼn tkubʼ qyekʼin qkʼujlabʼil tuʼntzun kyok xjal te t-xnaqʼtzbʼen Jesús. Teyele junjun xnaqʼtzbʼil in yolin tiʼj jun txʼolbʼabʼil ex tiʼj jun mod kubʼ tyekʼin Jesús moqa jun okslal te tnejel syent abʼqʼi tej kypakbʼan. Toj ambʼil jaʼlo, nya il tiʼj tuʼn tkyaj jun yekʼbʼil toj qwiʼ sino oʼkx tuʼn tkubʼ qyekʼin qkʼujlabʼil kyiʼj xjal. Maske mas in yolin folleto lu kyiʼj mod tuʼn qpakbʼan, kʼokel tqʼoʼn twitza tiʼj qa ax ikx in yolin kyiʼj junjun mod tuʼn t-xi tzyet tuʼn qyolin kyukʼil xjal, tuʼn t-xi qbʼinchaʼn qe revisita ex tuʼn qqʼon xnaqʼtzbʼil.

Aj t-xnaqʼtzana tiʼj teyele junjun xnaqʼtzbʼil, ximana tiʼj tzeʼn jaku txi tbʼinchaʼna aj tpakbʼana kye xjal jatumel in nanqʼina. Ex bʼaʼn tuʼn ttzaj tnaʼna qa mas nim toklen qkʼujlabʼil tiʼj Jehová ex kyiʼj xjal twitzju alkye tten tuʼn qpakbʼan. Tuʼntzunju, tzʼok tilil tuʼna tuʼn tchʼiy mas tkʼujlabʼila. Qa ma bʼant jlu tuʼna, kʼonil tiʼja tuʼn kyok xjal te t-xnaqʼtzbʼen Jesús.

Nimxix in qo tzalaje tuʼnju junx in qo aqʼunane kyukʼile (Sof. 3:9). Awt Jehová tzaj kʼiwlante kyeye tuʼnju in che onine tukʼil kʼujlabʼil tuʼn kyok xjal te t-xnaqʼtzbʼen Jesús.