TZʼONINA KYIʼJ XJAL TUʼN KYOK TE T-XNAQʼTZBʼEN JESÚS
XNAQʼTZBʼIL 10
Japunx toklena
Nabʼil toj Tyol Dios: «Bʼaʼn ela tuj qwitze tuʼn t-xi qmaʼne tqanil kolbʼil kyeye, aju tzaj tqʼoʼn Dios, ax ikx qaqʼ qibʼe tuʼn qajbʼene kyeye, tuʼnju at-xix qkʼuʼje kyiʼje» (1 Tes. 2:8).
Aju bʼant tuʼn Jesús
1. Qʼonka twitza tiʼj VIDEO moqa uʼjinktza Juan 3:1, 2. Yajxitl, xnaqʼtzankuya qe xjel lu:
-
¿Tiquʼn xiʼ Nicodemo yolil tukʼil Jesús toj qonikʼen? (Qʼonka twitza tiʼj Juan 12:42, 43).
-
¿Tzeʼn kubʼ tyekʼin Jesús qa nimtoq toklen tuʼn t-xi tqʼoʼn xnaqʼtzbʼil kye xjal?
¿Tiʼ xnaqʼtzbʼil jaku tzʼel qiʼn tiʼj Jesús?
2. Tuʼnju kʼujlan qe xjal quʼn, in nok tilil quʼn tuʼn qonin kyiʼj tuʼn kyok te t-xnaqʼtzbʼen Jesús.
Kanoʼmila tiʼj Jesús
3. Qʼonxa xnaqʼtzbʼil tiʼj Biblia te xjal toj or ex lugar mas bʼaʼn toj twitz. ¿In tzajpe tqʼamaʼn xjal alkye qʼij moqa alkye or mas bʼaʼn? Jatumel mas tgan xjal tuʼn t-xnaqʼtzan, ¿atzpe jatumel in naqʼunan, tja moqa jatumel ateʼ nim xjal? Tbʼanel qa ma bʼant junjun chʼixpubʼil tuʼna tuʼntzun t-xnaqʼtzan xjal tukʼila.
4. Jyona tumel tuʼn kukx t-xnaqʼtzan xjal. Qa mlay ten ambʼil tiʼja tuʼn t-xiʼya qʼol xnaqʼtzbʼil te xjal toj jun seman, jyonxa junjuntl tumel tuʼn t-xnaqʼtzan. ¿Jakupe bʼant jlu tuʼna?
5. Naʼna Dios tuʼn tten tbʼanel tmoda. Qaninxa onbʼil te Jehová tuʼn tonin tiʼja tuʼn kukx t-xi tqʼoʼna xnaqʼtzbʼil te xjal, mas qa nyaxix taj tuʼn t-xnaqʼtzan junjun seman moqa kwest tuʼn tkubʼ tqʼoʼn toj xnaqʼtzbʼil aju in nel tnikʼ tiʼj (Filip. 2:13). Qaninxa onbʼil te Jehová tuʼn tok tqʼoʼna twiʼya kyiʼj tbʼanel tmod xjal. ¡Bʼalo ateʼ nim tbʼanel tmod!
