TUʼN T-XI TZYET TUʼN TYOLINA
XNAQʼTZBʼIL 3
Ten tbʼanel tmoda
Nabʼil toj Tyol Dios: «Aju xjal at tkʼujlalil [...] in tzʼeʼy tkʼuʼj tiʼj tukʼil» (1 Cor. 13:4).
Aju bʼant tuʼn Jesús
1. Qʼonka twitza tiʼj VIDEO moqa uʼjinktza Juan 9:1-7. Yajxitl, xnaqʼtzankuya qe xjel lu:
-
Tiʼ bʼant tuʼn Jesús tnejel: ¿kubʼpe tqʼanin xjal moẍ moqa yolin tiʼj tbʼanel tqanil? (Qʼonka twitza tiʼj Juan 9:35-38).
¿Tiʼ xnaqʼtzbʼil jaku tzʼel qiʼn tiʼj Jesús?
2. Qa ma tzʼel tnikʼ xjal tiʼj qa in qo ximen tiʼj, maslo qo okel bʼiʼn tuʼn.
Kanoʼmila tiʼj Jesús
3. Ximana tiʼj xjal. Bʼaʼn tuʼn tok tilil tuʼna tuʼn tel tnikʼa tiʼjju in kubʼ tnaʼn xjal.
-
Xjelinkuya: «¿Alkye junjun tiʼchaq in tzaj bʼaj tkʼuʼj xjal tiʼj? ¿Alkye jun tiʼ tbʼanel in nela te moqa jaku tzʼonin tiʼj?». Ok che onil xjel lu tiʼja tuʼn tyolina tuʼn tkyaqil tkʼuʼja ex tuʼn tkubʼ tyekʼina tbʼanel tmoda.
-
Bʼaʼn tuʼn tok tbʼiʼna aju tzul tqʼamaʼn xjal teya. Qa ma txi tzyet tyolin tiʼjju in kubʼ tnaʼn moqa tiʼj jun nya bʼaʼn in nok weʼ twitz, miʼn kubʼ tchʼexpuʼna aju in yolin tiʼj.
4. Yekʼinkuya tbʼanel tmoda ex respetarina te xjal. Qa in tzaj qʼaqʼan qkʼuʼj tiʼj jun xjal ex qaj tuʼn qonin tiʼj, in kubʼ qyekʼin tukʼilju tzeʼn qo yolin. Tuʼntzunju, tenx tnabʼila tiʼj yol kʼajbʼel tuʼna ex tzeʼn kxel tqʼamaʼna. Miʼn txi tqʼamaʼna jun tiʼ jaku tzaj tbʼis xjal tuʼn.
5. Jaku tzʼonina tiʼj xjal. Qa jaku bʼant, jyonxa jun tumel tuʼn tonina tiʼj. Qa ma kubʼ tyekʼina tbʼanel tmoda, kʼonil tiʼja tuʼn t-xi tzyet tyolina tiʼj tbʼanel tqanil.
