TUʼN T-XI TZYET TUʼN TYOLINA
XNAQʼTZBʼIl 4
Miʼn jaw tnimsan tibʼa
Nabʼil toj Tyol Dios: «Bʼaʼn tuʼn t-ximan kyiʼj txqantl okslal qa at mas kyoklen twitz» (Filip. 2:3).
Aju bʼant tuʼn Pablo
1. Qʼonka twitza tiʼj VIDEO moqa uʼjinktza Hechos 26:2, 3. Yajxitl, xnaqʼtzankuya qe xjel lu:
-
¿Tzeʼn kubʼ tyekʼin Pablo qa kubʼ tin tibʼ tej tyolin tukʼil rey Agripa?
-
¿Tiʼ bʼant tuʼn Pablo tuʼn miʼn tok kyqʼoʼn xjal kywiʼ tiʼj, sino tiʼj Jehová ex tiʼj Xjan Uʼj? (Qʼonka twitza tiʼj Hechos 26:22).
¿Tiʼ xnaqʼtzbʼil jaku tzʼel qiʼn tiʼj Pablo?
2. Mas jaku tzʼok kyqʼoʼn xjal kywiʼ tiʼj tbʼanel tqanil qa ma kubʼ qin qibʼ ex qa ma kubʼ qyekʼin qa in qo respetarin kye.
Kanoʼmila tiʼj Pablo
3. Miʼn jaw tnimsan tibʼa. Miʼn kubʼ tyekʼina qa at mas teya tojtzqibʼil twitz xjal. Bʼaʼn tuʼn t-respetarina te aj tyolina tukʼil.
4. Yekʼinxa qa toj Biblia in jatz tkyaqil xnaqʼtzbʼil. Jaku tzʼonin Biblia kyiʼj xjal. Qa ma tzʼajbʼen quʼn, kʼonil kyiʼj tuʼn tten kyokslabʼil moqa kynimbʼil kyuw.
5. Yekʼinkuya tbʼanel tmoda. Miʼn tzʼok tilil tuʼna tuʼn tkubʼ tyekʼina qa ax tok aju in tqʼamaʼna, tuʼnju mintiʼ in qo jyon qʼoj kyukʼil xjal. Qa ma kubʼ tin tibʼa, kʼonil tiʼja tuʼn miʼn ttzaj naj tqʼoja ex tuʼn tel tnikʼa tiʼj toj alkye ambʼil jaku tzikʼ bʼeta (Prov. 17:14; Tito 3:2). Ax ikx, qa ma kubʼ tyekʼina tbʼanel tmoda, jakulo tzʼonin tuʼn ttzaj tqʼoʼn xjal ambʼil tuʼn qyolin tukʼil aj qikʼ pakbʼal juntl maj.
