TUʼN T-XI TZYET TUʼN TYOLINA
XNAQʼTZBʼIL 5
Ximana tiʼj tyola
Nabʼil toj Tyol Dios: «Chebʼa che yoline tkyaqil maj» (Col. 4:6).
Aju bʼant tuʼn Pablo
1. Qʼonka twitza tiʼj VIDEO moqa uʼjinktza Hechos 17:22, 23. Yajxitl, xnaqʼtzankuya qe xjel lu:
-
¿Tiʼ kubʼ tnaʼn Pablo tej tok tkeʼyin nojni toj tnam Atenas kyuʼn tilbʼilal? (Qʼonka twitza tiʼj Hechos 17:16).
-
¿Tzeʼn kubʼ tyekʼin apóstol Pablo qa ximen kyiʼj xjal te tnam Atenas tej tpakbʼan?
¿Tiʼ xnaqʼtzbʼil jaku tzʼel qiʼn tiʼj Pablo?
2. Maslo jaku qo ok bʼiʼn kyuʼn xjal qa ma qo ximen tiʼj qyol in xi qqʼamaʼn, tzeʼn kxel qqʼamaʼn ex toj alkye ambʼil kxel qqʼamaʼn.
Kanoʼmila tiʼj Pablo
3. Ximana kyiʼj tyola. Jun techel, qa ma yolina tukʼil jun xjal nya okslal, bʼalo il tiʼj tuʼn t-xi tjyoʼna tumel tzeʼn tuʼn tyolina tukʼil tiʼj Biblia ex tiʼj Jesús.
4. Miʼn txi tqʼamaʼna te xjal qa nya ax tok aju in tzaj tqʼamaʼn. Qʼonxa ambʼil te tuʼn tyolin. Ex qa ma tzaj tqʼamaʼn jun xnaqʼtzbʼil nya ax tok, miʼn txi tqʼamaʼna qa nya ax tok tyol (Sant. 1:19). Qa ma tzʼok tbʼiʼna, kʼonil tiʼja tuʼn tel tnikʼa tiʼjju nimen tuʼn ex tiquʼn in xi tnimen (Prov. 20:5).
5. Qa jaku bʼant, qʼamanxa tbʼanel yol te ex felisitarinxa. Bʼalo in nok qeʼ tkʼuʼj xjal tiʼjju nimen tuʼn. Tuʼntzunju, bʼaʼn tuʼn t-xi tzyet tyolina tiʼj jun tiʼ tgan, ex yajxitl, chebʼe chebʼe jaku tzʼonina tiʼj tuʼn tel tnikʼ tiʼjju in tzaj t-xnaqʼtzaʼn Biblia.
