Atxix ojtxe, taj (tgan) Jehová tuʼn tel kypaʼn tatbʼaj ambʼil tuʼn kyten kyukʼe toj kyja tuʼn tchʼiy kyamiwbʼil tukʼe Jehová ex tuʼn tchʼiy tbʼanel kyxol kyukʼe toj kyja (Deuteronomio 6:6, 7). Tuʼntzun aju, in nel kypaʼn testigos de Jehová jun ambʼil tkyaqil seman tuʼn t-xi kyqʼoʼn te Dios, atz jatumel in che xnaqʼtzan kyukʼe toj kyja tiʼj Tyol Dios toj tzalajbʼil, naq alkyexku kyten ex naq alkye atx taj kye. Qa in nanqʼina tjunalxa, ax ikx jaku txi tqʼoʼna ambʼil lu te Dios aj t-xnaqʼtzana tiʼj alkyexku xnaqʼtzbʼil kjawil tjyoʼna.

Jun ambʼil tuʼn qxi laqʼeʼ ttxlaj Jehová. «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8). Qa in qo xnaqʼtzan kyiʼj tmod Jehová toj Tuʼjil Tyol (Biblia) ex tiʼjju in bʼant tuʼn, in nelxix qnikʼ tiʼj. Jun tten aju nya kwest tuʼn t-xi tzyet Ambʼil in xi qqʼoʼn kyukʼe toj qja te Jehová aju qa ma tzʼel qpaʼn chʼin ambʼil tuʼn tjaw quʼjen Tyol Dios tukʼe tqʼajqʼajel qwiʼ, tuʼn tbʼant jlu, jakule tzʼajbʼen quʼn aju tajlal te junjun seman tkuʼx toj chmabʼil Kyanqʼibʼil Okslal ex Kypakbʼabʼil. Jaku txi qʼamet kye toj qja tuʼn tjaw kyuʼjen junjun taqikʼ Tyol Dios ex jaku tzaj kyqʼamaʼn aju sel kynikʼ tiʼj.

Jun ambʼil tuʼn qok laqʼeʼ kyiʼj toj qja. Qa junx in xnaqʼtzan jun chmilbʼaj tukʼe t-xuʼjel tiʼj Tyol Dios in chʼiy tbʼanel kyxol ex qa junx in che xnaqʼtzan tatbʼaj kyukʼe kykʼwaʼl in chʼiy tbʼanel kyxol. Ilxix tiʼj tuʼn tbʼaj kyximen alkye tten tuʼn kytzalaj toj ambʼil aju ex tuʼn tkubʼ kyayon ambʼil lu tkyaqil seman. Bʼaʼn tuʼn kyximen tatbʼaj tiʼj kyabʼqʼi kykʼwaʼl tuʼn kyjaw kyjyoʼn xnaqʼtzbʼil aju at tajbʼen kye kykʼwaʼl toj uʼj Aju Xqʼuqil ex ¡Despertad! moqa toj tembʼil toj Internet jw.org/mam. Jaku che yolen tiʼj alkyexku nya bʼaʼn in che ok weʼ kykʼwaʼl twitz ex tiʼj alkye tten tuʼn kyex twitz nya bʼaʼn. ¿Yajtzun qa ma tzʼok kyqʼoʼn kywitz tiʼj jun programa toj JW Broadcasting (tv.pr418.com) ex yajxitl tuʼn kyyoline junx tiʼj? Ax ikx jaku che xnaqʼtzan kyiʼj bʼitz che xel bʼitzit kyoj chmabʼil ex jaku txi kywaʼn jun kywa tukʼe chʼin kykʼaʼ aj tel bʼaj Ambʼil in xi kyqʼoʼn kyukʼe toj kyja te Jehová.

Qa ma tzʼel tpaʼna ambʼil kyukʼe toj tjaya tkyaqil seman tuʼn t-xi qʼet te Jehová, ok kʼonil kyiʼje tuʼn kytzalaje kykyaqile aj kyxnaqʼtzane tiʼj Tyol Dios ex ktzajel tkʼiwlaʼn Jehová tkyaqilju kbʼantel kyuʼne (Salmo 1:1-3).

• ¿Tiquʼn in nel qpaʼne jun ambʼil kyukʼe toj qjaye tuʼn t-xi qʼet te Jehová?

• ¿Tiʼ jaku bʼant kyuʼn tatbʼaj tuʼn kytzalaj toj kyja toj ambʼil toj aju?