XNAQʼTZBʼIL 17
¿Alkye tten in qo tzaj kyonine ansyan in che bʼet kyojele Ja te Chmabʼil?
Malaui
Jun kʼloj pakbʼal
In che pakbʼan
Chmabʼil kye ansyan
Aju Tuʼjil Tyol Dios (Biblia) kubʼ tzʼibʼen toj yol griego in yolin nim (bʼampo) maj tiʼj Bernabé ex tiʼj apóstol Pablo. Aʼyeju xjal lu e bʼet kyojele tnejel Ja te Chmabʼil. ¿Tiquʼn? Tuʼnju kyajtaq (kygantoq) tuʼn kyonin kyiʼj kyerman. Tqʼama Pablo qa tajtaq tuʼn tmeltzʼaj «juntl maj visitaril kye erman» tuʼn tok tqʼoʼn twitz kyiʼj qa bʼaʼn ateʼqetaq. Tajtaq tuʼn tbʼet nim tuʼn t-xiʼ qʼuqbʼal kykʼuʼj (Hechos 15:36). Ax ikx toj ambʼil jaʼlo (jaʼla) kyaj qe ansyan in che bʼet kyojele Ja te Chmabʼil tuʼn tbʼant jlu kyuʼn.
In che ul qʼuqbʼal qkʼuʼje. Teyele te junjun ansyan in bʼet toj jun kʼloj Ja te Chmabʼil in nikʼ toj junlo 20 Ja te Chmabʼil, in ten jun seman toj junjun Ja te Chmabʼil ex kabʼe maj toj abʼqʼi in nikʼ kyojele Ja te Chmabʼil. In nel qkanoʼne nimku tbʼanel kyiʼj qermane lu tuʼnju at kynabʼil ex qa at kyxuʼjil ax ikx in nel qkanoʼne kyiʼj. In nok tilil kyuʼn tuʼn tok kyojtzqiʼn kywitz kykyaqil ex kyaj tuʼn kyex pakbʼal qukʼile ex tuʼn kyxiʼ qʼol xnaqʼtzbʼil kye xjal qukʼile. Aʼye ansyan in che bʼet kyojele Ja te Chmabʼil in cheʼx kyukʼe ansyan qʼolbʼel qe txqantl erman, ex in nok kyqʼuqbʼaʼn qkʼuʼje aj tetz kyqʼoʼn chikʼbʼabʼil kyoj chmabʼil ex nimaq chmabʼil (Hechos 15:35).
In kubʼ kyyekʼun qa at kykʼuʼj kyiʼj kykyaqil. Kyaj qe ansyan in che bʼet kyojele Ja te Chmabʼil tuʼn tchʼiy kyamiwbʼil okslal (nimel) tukʼe Dios. Aʼyeju ansyan in che bʼet kyojele Ja te Chmabʼil in nok kychmon kyibʼ kyukʼe ansyan ex kyukʼe onil kye ansyan tuʼn kyyolin tibʼaj aqʼuntl o bʼant ex in xi kyqʼoʼn kawbʼil kye alkye tten tuʼn tbʼant kyaqʼun. In che onin kyiʼj qeju in che pakbʼan toj tkyaqil ambʼil tuʼn tbʼant-xix kypakbʼan, ex kyaj tuʼn tok kyojtzqiʼn kywitz qeju tzma in nok kychmon kyibʼ ex kyaj tuʼn tok kybʼiʼn qa in nok tilil kyuʼn tuʼn kyajbʼen te Dios. Teyele te junjun ansyan in bʼet kyojele Ja te Chmabʼil in che «aqʼnan junx» tuʼn kyonin qiʼje (2 Corintios 8:23). Tbʼanelxix tuʼn tel qkanoʼn qʼuqbʼil kykʼuʼj ex aju alkye tten in che ajbʼen te Dios (Hebreos 13:7).
-
¿Tiquʼn in che bʼet ansyan kyojele Ja te Chmabʼil?
-
¿Tiʼ kbʼantel tuʼna tuʼn kyonin tiʼja?
