At nim (bʼampo) xjal ya mitiʼtl in cheʼx toj jun ja te kʼulbʼil, moqa toj jun ja te nabʼil dios, tuʼnju mitiʼ (tiloʼ) in che tzaj onin tuʼn tel kynikʼ tiʼj Tyol Dios moqa mitiʼ in tzaj qʼuqbʼaʼn kykʼuʼj. Qa ikju, ¿tiquʼn il tiʼj tuʼn t-xiʼya toj kychmabʼil testigos de Jehová? ¿Tiʼ kkanetel tuʼna kyoj chmabʼil?

Ok ktzalajela kyxol xjal in nok kykʼujlan kyibʼ. Toj tnejel syent abʼqʼi, in noktaq kychmon kyibʼ okslal (nimel) kyoj Ja te Chmabʼil tuʼn kyajbʼen te Dios, tuʼn kyxnaqʼtzan tiʼj Tyol Dios ex tuʼn tok kyqʼuqbʼaʼn kykʼuʼj kyxolx (Hebreos 10:24, 25). Tuʼnju attaq kʼujlabʼil kyxol, in kynaʼntaq qa ateʼtaq kyxol axix tok (bʼaʼn ax) kyamiw (2 Tesalonicenses 1:3; 3 Juan 14, 15). Ax ikx qeye in qnaʼne tzalajbʼil tuʼnju in nel qkanoʼne techel kyaj kyqʼoʼn tnejel okslal.

Ok kʼelel tnikʼa tzeʼn jaku che ajbʼen tkawbʼil Dios tuʼna. Ik tzeʼn toj ambʼil ojtxe, in nok qchmon qibʼe qkyaqile qe xinaq, moqa ichan, qe xuʼj, ex qe kʼwaʼl tuʼn qbʼine kyiʼj qeju bʼaʼn che xnaqʼtzan tuʼn qtzaj kyonine tuʼn tel qnikʼe alkye tten che ajbʼel tkawbʼil Dios quʼne tkyaqil qʼij (Deuteronomio 31:12; Nehemías 8:8). Qkyaqil jaku txi qqʼoʼn qyol ex jaku qo bʼitzan, a jlu in tzaj tqʼoʼn ambʼil qe tuʼn tkubʼ qyekʼun qʼuqbʼil qkʼuʼj (Hebreos 10:23).

Ok kchʼiyil qʼuqbʼil tkʼuʼja tiʼj Dios. Xi tqʼamaʼn apóstol Pablo jlu kye okslal: «Wajbʼile tuʼn tok nkeʼyine kywitze, [...] ok npone kyukʼile, kbʼajel qkyuwsan qibʼ qxolx noq tuʼn qokslabʼl, tuʼn kyokslabʼle ex tuʼn wokslabʼle» (Romanos 1:11, 12). Tuʼnju kukx in nok qchmon qibʼe kyukʼil qermane in qo tzaj tonine tuʼn kukx tchʼiy qʼuqbʼil qkʼuʼje ex tuʼn kukx qanqʼine ik tzeʼn taj Dios.

Bʼaʼn tuʼn t-xi tbʼiʼna txokbʼil in tzaj qʼoʼn teya tuʼn t-xiʼya toj chmabʼil tuʼn tel tnikʼa tiʼj tkyaqilju ma bʼaj qʼamet. Ok qo tzalajele qa ma pona. Naq kukx in che okx xjal toj tkyaqil chmabʼil ex mitiʼ in xi qanit pwaq.

• Aj tok qchmon qibʼe, ¿alqiʼj in nel qkanoʼne?

• ¿Alkye tten jaku tzʼonin qiʼj qa ma qoʼx kyoj chmabʼil?