Tej in noktaq kychmon kyibʼ tnejel okslal (nimel) in che bʼitzentaq, in che naʼntaq Dios, in che uʼjintaq ex in che xnaqʼtzantaq tiʼj Tyol Dios (1 Corintios 14:26). Axju in bʼant quʼne toj ambʼil jaʼlo (jaʼla) aj tok qchmon qibʼe.

Atz in jatz xnaqʼtzbʼil toj Tyol Dios ex at tajbʼen. Aj tjapun junjun seman, in netz qʼoʼn kyojele Ja te Chmabʼil jun chikʼbʼabʼil tiʼj Tyol Dios te 30 minut atz jatumel in tzaj yekʼun alkye toklen Tyol Dios tukʼe qanqʼibʼil ex tukʼe ambʼil jatumel in qo anqʼin. Ax ikx in tzaj qʼamaʼn qeye tuʼn kykux qjyoʼne taqikʼ Tyol Dios in che etz tqʼamaʼn chikʼbʼal. Aj tel bʼaj chikʼbʼabʼil, in xi tzyet juntl chmabʼil te jun or aju Xnaqʼtzbʼil tiʼj uʼj Aju Xqʼuqil, atz jatumel in tzaj kyqʼoʼn kyyol qeju in che pon toj chmabʼil tuʼn tkubʼ xnaqʼtzet jun xnaqʼtzbʼil tkuʼx toj uʼj Aju Xqʼuqil. A jlu in nonin qiʼje tuʼn tel qnikʼe alkye tten tuʼn kyajbʼen kawbʼil ateʼkux toj Tyol Dios quʼne. Kyoj qeju mas te 110.000 kʼloj okslal in nok kychmon kyibʼ twitz tkyaqil Txʼotxʼ ax xnaqʼtzbʼil in kubʼ kyxnaqʼtzaʼn.

In qo tzaj onine tuʼn tbʼant-xix qqʼone xnaqʼtzbʼil. Ax ikx in nok qchmon qibʼe toj jun qonikʼan toj junjun seman jatumel in qo xnaqʼtzane kyiʼj oxe xnaqʼtzbʼil toj chmabʼil aju tok tbʼi Kyanqʼibʼil Okslal ex Kypakbʼabʼil, aju in jatz toj Uʼj te aqʼuntl toj chmabʼil Kyanqʼibʼil Okslal ex Kypakbʼabʼil. Aju tnejel xnaqʼtzbʼil tiʼj chmabʼil lu, Aʼyeju qʼinumabʼil toj Tyol Dios, in nonin qiʼje tuʼn tok qojtzqiʼnxixe junjun taqikʼ Tyol Dios aju otoqxi jaw kyuʼjin qeju in che pon toj chmabʼil. Aju tkabʼ xnaqʼtzbʼil, Qo ok te Tbʼanel aj Xnaqʼtzal, in che kubʼ qʼet yekʼbʼil toj tiʼj alkye tten tuʼn qyoline kyukʼil xjal tiʼj Tyol Dios. At jun erman in tzaj tqʼoʼn junjun nabʼil tuʼn tonin qiʼje tuʼn tbʼant-xix quʼjine ex tuʼn tbʼant-xix qyoline (1 Timoteo 4:13). Ex aju toxin xnaqʼtzbʼil, ¿Alkye tten tuʼn Kyanqʼin Okslal?, in nonin qiʼje alkye tten tuʼn tkubʼ qqʼoʼne toj xnaqʼtzbʼil aʼyeju nabʼil tkuʼx toj Tyol Dios toj qanqʼibʼile junjun qʼij. A jlu jun chikʼbʼabʼil tukʼil jun xjel ex tzaqʼwebʼil, a jlu in nonin qiʼje tuʼn tchʼiy mas qojtzqibʼile tiʼj Tyol Dios.

Qa ma txiʼya kyoj chmabʼil, ok ktzalajela aj tok tqʼoʼn twitza tiʼj tbʼanelxix xnaqʼtzbʼil in netz qʼoʼn (Isaías 54:13).

• ¿Tiʼ kʼokel tbʼiʼna kyoj kychmabʼil testigos de Jehová?

• Qa ma qoʼx kyoj chmabʼil, ¿tzeʼn jaku tzʼonin jlu qiʼj?