At maj in qo bʼete tjaqʼ kʼul, in qo bʼete tjaqʼ jbʼal, naqtzun tuʼnj, kukx in qo bʼete kyoj chmabʼil. In qo ok weʼye twitz nimku (bʼampo) nya bʼaʼn ex siktni qoʼye aj qule aqʼunal, naqtzen tuʼnj, ¿tiquʼn kukx in nok qchmon qibʼe kyukʼe qermane?

Qexe in najbʼen. Kubʼ ttzʼibʼen apóstol Pablo jlu kye qeju in nok kychmon kyibʼ: «Qo ximan tiʼj tuʼn qkyuwsante qibʼ qxolx», moqa tuʼn qonin qibʼ qxolx (Hebreos 10:24). Aju txol yol lu a t-xilen qa il tiʼj tuʼn tok qojtzqiʼn qibʼ qxolx. Aʼyeju tyol apóstol Pablo in nonin qiʼj tuʼn qximen kyiʼj txqantl. Aj tok qojtzqiʼne txqantl okslal (nimel) kyukʼe toj kyja, in nel qnikʼe qa at junjun kye o tzikʼx junjun nya bʼaʼn kyuʼn ik tzeʼn qeye in qo ok weʼye twitz, a jlu in tzaj tyekʼun qa ax ikx qeye jaku tzikʼx nya bʼaʼn quʼne.

In chʼiy qamiwbʼile qxole. Aj tok qchmon qibʼe nya oʼkx qojtzqiʼn qwitze, quʼn ax ikx qamiw qibʼe. Toj junjuntl maj in nel qpaʼne ambʼil tuʼn qsaqchane junx kyiʼj tbʼanel saqchbʼil. ¿Tzeʼn in nonin jlu qiʼje? In nonin tuʼn tchʼiy kʼujlabʼil qxole. Aj kyok weʼ qermane twitz nya bʼaʼn, in qoʼx naje onil kye tuʼnju qamiw qibʼe (Proverbios 17:17). Aj tok qchmon qibʼe kyukʼe qermane, in nok ‹qkwentin qibʼe qxolxe› (1 Corintios 12:25, 26).

Bʼaʼn tuʼn kyjaw tjyoʼn tamiwoya kyxol qeju in kubʼ kybʼinchaʼn tajbʼil Dios. Ok che kanetel amiw lu tuʼna kyxol testigos de Jehová. Miʼn txi tqʼoʼna ambʼil te alkyexku tuʼn miʼ t-xiʼya kyoj chmabʼil.

• ¿Tiquʼn qexe in najbʼen aju in nok qchmon qibʼe?

• ¿Jtoj jaku tzʼok tchmon tibʼa qukʼile?