Tej chʼixtaq tkyim Jesús tqʼama jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14). Naqtzun tuʼnj, ¿alkyetaq tten kxel pakbʼet jlu twitz tkyaqil Txʼotxʼ? Oʼkx qa ma tzʼel qkanoʼn techel kyaj tqʼoʼn Jesús tej tten tzalu twitz Txʼotxʼ (Lucas 8:1).

In nok tilil quʼne tuʼn qxiʼye pakbʼal kyja xjal. E kubʼ t-xnaqʼtzaʼn Jesús qeju e ok lepeʼ tiʼj tuʼn kyxiʼ pakbʼal tbʼanel tqanil kyojele ja (Mateo 10:11-13; Hechos 5:42; 20:20). Xi qʼamaʼn kye qeju tnejel okslal (nimel) lu jaʼxix tumel tuʼn kypakbʼan (Mateo 10:5, 6; 2 Corintios 10:13). Ax ikx toj ambʼil jaʼlo (jaʼla), in bʼaj qnukʼuʼn qtene tuʼn qpakbʼane, ex in tzaj qʼamaʼn kye qeju in nok kychmon kyibʼ toj jun Ja te Chmabʼil jatumel che pakbʼal. A jlu in nonin qiʼje tuʼn tjapun quʼne aju kyaj tqʼamaʼn Jesús aju «tuʼn t-xi qpakbʼaʼne kye xjal ex tuʼn t-xi qchikʼbʼaʼne kye» (Hechos 10:42).

In nok tilil quʼne tuʼn qyoline jaxku tumel kyukʼe xjal. Ax ikx kyaj tqʼoʼn Jesús techel tej tpakbʼan jatumel attaq nim (bʼampo) xjal, ik tzeʼn ttzi mar ex ttzi xoch (Marcos 4:1; Juan 4:5-15). Ax ikx qeye in qo yoline tiʼj Tyol Dios jaxku tumel, toj bʼe, kyoj kʼaybʼil, toj yolbʼil ex toj junjuntl tembʼil jatumel in che pon xjal. Ax ikx in qo yoline kyukʼe qeju in che anqʼin ttxlaj qjaye, kyukʼe qeju in che aqʼunan junx qukʼile, kyukʼe qeju in che xnaqʼtzan junx qukʼile ex kyukʼe toj qjaye. Tkyaqil jlu in nonin tuʼn tok kybʼiʼn nimxix xjal «tqanil kolbʼil» twitz tkyaqil Txʼotxʼ (Salmo 96:2).

Ximana tiʼj alqe jaku txi tqʼamaʼna tbʼanel tqanil tiʼj tKawbʼil Dios ex aju kbʼantel tuʼn Kawbʼil lu twitz Txʼotxʼ. Bʼaʼn tuʼn t-xi tqʼamaʼn naja aju tbʼanel tqanil lu kye txqantl.

• ¿Alkye «tqanil bʼaʼn» ilxix tiʼj tuʼn t-xi pakbʼet?

• ¿Tzeʼn in nel kykanoʼn testigos de Jehová aju alkye tten pakbʼan Jesús?