Tkyaqil Ja te Chmabʼil kye testigos de Jehová tok tbʼi Dios tiʼj. Tuʼntzunju nimxix toklen toj qwitze tuʼn qonine tuʼn tbʼaj saqet, tuʼn tten toj tbʼanel ex tuʼn tbʼaj bʼinchet Ja te Chmabʼil ex at toklen jlu tukʼeju tuʼn qajbʼene te Dios. Kykyaqil jaku che onin.

Jaku txi qqʼamaʼn qa qaj tuʼn qonin aj tel bʼaj chmabʼil. Aj tel bʼaj chmabʼil, in che tzalaj ermano ex ermana tuʼn tjaw kyiʼn tzʼis toj Ja te Chmabʼil. Jun maj toj jun seman, in bʼaj saqet (ẍnuʼlit) tojxi ex tiʼjxi Ja te Chmabʼil. At jun ansyan moqa jun onil kye ansyan in xi t-sipen aqʼuntl, chʼixmi toj tkyaqil maj in nok lepeʼ tiʼj jun tajlal aqʼuntl kbʼantel. Naq alkye aqʼuntl il tiʼj tuʼn tbʼant, teyele te junjun in xi tqʼamaʼn te ansyan moqa te onil kye ansyan qa taj (tgan) tuʼn tjaw tiʼn tzʼis, tuʼn tjaw t-suʼn twitz piso, tuʼn tel t-suʼn quq tiʼj junjun tiʼ, tuʼn kybʼaj tnukʼun qʼuqbʼil, tuʼn kybʼaj ttxʼjoʼn tzʼalbʼil, tuʼn tel t-suʼn kywitz espejo ex kywitz ventan, tuʼn t-xiʼ xoʼl tzʼis, tuʼn tjaw tiʼn tzʼis tiʼjele Ja te Chmabʼil ex tuʼn kyok t-xqʼuqin qe bʼech qa atqeʼ. Jun maj toj jun abʼqʼi in nel qpaʼne jun qʼij tuʼn tbʼaj saqet tkyaqilju at tojxi ex tiʼjxi Ja te Chmabʼil. Aj t-xi qqʼamaʼn kye qkʼwaʼl tuʼn kyonin qukʼe tiʼj aqʼuntl lu, in xi qyekʼun kye qa nim toklen toj qwitz aju jatumel in qo naʼn Dios (Eclesiastés 5:1).

Jaku txi qqʼamaʼn qa qaj tuʼn qonin tuʼn tbʼaj bʼinchet chʼintl Ja te Chmabʼil. Jun maj toj jun abʼqʼi in nok qʼet witzbʼaj tiʼj tkyaqilju at tojxi ex tiʼjxi Ja te Chmabʼil. Aj tbʼant jlu, in nok bʼinchet aju nyaxix bʼaʼn taʼ tuʼn tten Ja te Chmabʼil toj tbʼanel, iktzun tten in qo onin tuʼn miʼn tbʼaj najset pwaq naq kukx (2 Crónicas 24:13; 34:10). Qa saq taʼ jun ja te chmabʼil ex qa bʼaʼn taʼ, jun tbʼanel ja jlu jatumel jaku jaw qnimsaʼn Dios. Qa in qo onin tuʼn tbʼant aqʼuntl lu in kubʼ qyekʼun qa kʼujlaʼn Jehová quʼn ex qa nim toklen toj qwitz aju ja jatumel in qo naʼn Dios (Salmo 122:1). Ax ikx qa saq taʼ jun ja te chmabʼil ex qa bʼaʼn taʼ, tbʼanel in nela toj kywitz xjal (2 Corintios 6:3).

• ¿Tiquʼn ilxix tiʼj tuʼn tbʼaj qsaqin aju ja jatumel in qo naʼn Dios?

• ¿Tiʼ in bʼant tuʼn kukx tten Ja te Chmabʼil te saq?