Toj tnejel syent abʼqʼi, attaq jun tal kʼloj «apostl» ex «ansyan» in che ajbʼentaq te jun kʼloj xjal qʼil twitz aqʼuntl tuʼn tbʼaj ximet aju nimtaq toklen kyxol okslal (nimel) o che jaw jyoʼn (Hechos 15:2). In kyajtaq bʼant tiʼj jun kyyol tuʼnju in che xnaqʼtzanxixtaq tiʼjju in tzaj tqʼamaʼn Tyol Dios ex tuʼnju in xi kyqʼoʼntaq ambʼil te xewbʼaj xjan (Hechos 15:25). Ax jlu in bʼant toj ambʼil jaʼlo.

In najbʼen tuʼn Dios tuʼn tbʼant tajbʼil. At junjun kyxol qeju o che jaw jyoʼn at kyoklen tiʼj Kʼloj Xjal Qʼil Twitz Aqʼuntl, aʼye jlu kyajxix (kyganxix) tuʼn kyxnaqʼtzan tiʼj Tyol Dios ex at nim kynabʼil tuʼn tbʼaj ximet alkye tten tuʼn tbʼant aqʼuntl ex alkye tten tuʼn tqʼet xnaqʼtzbʼil tiʼj Tyol Dios. In nok kychmon kyibʼ tkyaqil seman tuʼn tbʼaj ximit alkye at tajbʼen kye erman twitz tkyaqil Txʼotxʼ. Ik tzeʼn toj tnejel syent abʼqʼi, in tzaj kyqʼoʼn xnaqʼtzbʼil aju in jatz toj Tyol Dios, tuʼn tbʼant jlu kyuʼn, in che ajbʼen uʼj kyuʼn, ex qeju ansyan in che bʼet kyojele Ja te Chmabʼil ex junjuntl. A jlu in nonin kyiʼj qeju ateʼkx toj ttnam Dios tuʼn tten junx kyxim ex junx kybʼinchbʼen (Hechos 16:4, 5). Aju Kʼloj Xjal Qʼil Twitz Aqʼuntl in nok tqʼoʼn twitz tiʼj alkye tten in bʼaj bʼinchet xnaqʼtzbʼil tiʼj Tyol Dios, in nok tqʼuqbʼaʼn kykʼuʼj kykyaqil tuʼn tok tilil kyuʼn tuʼn kypakbʼan tiʼj tKawbʼil Dios ex in nok tqʼoʼn twitz tiʼj alkye tten in xi qʼoʼn kyoklen ermano.

In xi tqʼoʼn ambʼil te xewbʼaj xjan. Aju Kʼloj Xjal Qʼil Twitz Aqʼuntl in jyon onbʼil tukʼe Jehová, aju at Toklen tibʼaj tkyaqil, ex tukʼe Jesús, aju Wibʼaj kye okslal (1 Corintios 11:3; Efesios 5:23). Mi aʼl jun kyxol qe jlu in kubʼ kyximin qa aʼyexix nejenel toj ttnam Dios. Junx kyukʼil txqantl okslal o che jaw jyoʼn «in che ok lpeʼ tiʼj Tal Ẍneʼl nok jaʼx jatum in xiʼ» (Apocalipsis 14:4). Aju Kʼloj Xjal Qʼil Twitz Aqʼuntl in tzalaj qa ma tzaj qnaʼn toj qnaʼj Dios.

• ¿Alkyeqe xi qʼoʼn kyoklen tuʼn kyok te Kʼloj Xjal Qʼil Twitz Aqʼuntl toj tnejel syent abʼqʼi?

• ¿Alkye tten in jyon Kʼloj Xjal Qʼil Twitz Aqʼuntl onbʼil tukʼe Dios toj ambʼil jaʼlo?