Tej chʼixtaq tkyim Jesús, yolin kyukʼe kyaje t-xnaqʼtzbʼen, tukʼe Pedro, Santiago, Juan ex Andrés. Tej in yolintaq Jesús kyiʼj techel aj tkawintaq toj bʼajsbʼil tqʼijlal tqʼama jun tiʼ nimxix toklen: «Aju majen in bʼant taqʼun [...] ex at tnabʼl, kʼokel qʼoʼn tuʼn tpatrón te kwentil kye qeju ateʼ tuj tja, tuʼn t-xi qʼot kywa ok tpon or» (Mateo 24:3, 45; Marcos 13:3, 4). Xi tqʼuqbʼaʼn Jesús kykʼuʼj qeju lepchiqeʼk tiʼj qa oktaq kxel tqʼoʼn kyoklen qeju kukx che qʼol wabʼj toj bʼajsbʼil tqʼijlal tuʼnju a patrón kye. ¿Alkyeqe jlu?

Jun tal kʼloj qeju lepcheqeʼk qe tiʼj Jesús aʼyeju o che jaw jyoʼn tuʼn xewbʼaj xjan. Aju «majen» ax aju in nok te Kʼloj Xjal Qʼil Twitz Aqʼuntl kye Testigos de Jehová. In xi tqʼoʼn kywa qeju in che ajbʼen te Jehová toj ambʼil bʼantni tiʼj. Kukx in tzaj tqʼoʼn «majen in bʼant taqʼun» qwa tuʼntzun kukx qwaʼn «ok tpon or» (Lucas 12:42).

In xqʼuqin tiʼj tja Dios (1 Timoteo 3:15). O txi tqʼoʼn Jesús nimxix taqʼun majen toj ttnam Jehová tzalu twitz Txʼotxʼ, tuʼn tok t-xqʼuqin tkyaqilju at te, tuʼn tkubʼ t-ximen alkye tten tuʼn t-xi pakbʼet Tyol Dios, ex tuʼn ttzaj tqʼoʼn xnaqʼtzbʼil qe kyoj Ja te Chmabʼil. Tuʼn tbʼant jlu tuʼn «majen in bʼant taqʼun [...] ex at tnabʼl», in che etz uʼj, in che ok chmabʼil ex in che ok nimaq chmabʼil. Iktzun tten in tzaj tqʼoʼn aju at tajbʼen qe ex toj ambʼil bʼantni tiʼj.

Aju majen in bʼant taqʼun tuʼnju in tzaj t-xnaqʼtzaʼn aju axix tok (bʼaʼn ax) tkuʼx toj Tyol Dios ex in xi tpakbʼan tbʼanel tqanil, ex at tnabʼl tuʼnju in najbʼen tnabʼil aj tok t-xqʼuqin tkyaqilju at te Jesucristo tzalu twitz Txʼotxʼ (Hechos 10:42). In tzaj tkʼiwlaʼn Jehová taqʼun majen tuʼnju ma chʼiy kybʼet qeju in che ajbʼen te Dios ex in tzaj tqʼoʼn nim xnaqʼtzbʼil tiʼj Tyol Dios (Isaías 60:22; 65:13).

• ¿Alqe o txi tqʼoʼn Jesús oklenj tuʼn t-xi tqʼoʼn kywa qeju lepchiqeʼk tiʼj?

• ¿Tiquʼn jaku txi qqʼamaʼn qa in bʼant taqʼun ex at tnabʼil aju majen?