Aʼyeju in che anqʼin toj Betel at nim (bʼampo) aqʼuntl in bʼant kyuʼn, iktzun tten in che onin tuʼn t-xi pakbʼet tbʼanel tqanil kyoj nimku tnam. Atlo junjun in che aqʼunan tuʼn kykubʼ qʼet uʼj kyoj txqantl yol, tuʼn kyetz uʼj toj kʼuxbʼil, tuʼn tok kyxkʼomel uʼj, tuʼn kybʼaj nukʼet uʼj, tuʼn kyetz qbʼibʼetz ex tuʼn kyetz video moqa tuʼn tbʼant junjuntl aqʼuntl aju at toklen kyukʼe qe tnam ateʼkx tjaqʼ tkawbʼil jun ninja.

Kʼloj ansyan toj Ninja qʼil twitz aqʼuntl. Tkyaqil aqʼuntl in bʼant kyojele ninja in kyaj tqʼoʼn Kʼloj Xjal Qʼil Twitz Aqʼuntl toj kyqʼabʼ jun Kʼloj ansyan, aʼyeju ansyan lu at maj at oxe kybʼet moqa mas. Aju Kʼloj ansyan toj Ninja in xi tqʼamaʼn te Kʼloj Xjal Qʼil Twitz Aqʼuntl tkyaqilju in bʼant kyoj tnam ateʼkx tjaqʼ tkawbʼil ex aju junjun nya bʼaʼn jaku tzaj. A jlu in nonin tiʼj Kʼloj Xjal Qʼil Twitz Aqʼuntl tuʼn tbʼaj t-ximen alkyeqe xnaqʼtzbʼil che kbʼel qʼet kyoj uʼj, che xel qʼet kyoj chmabʼil ex kyoj nimaq chmabʼil. At jun ansyan in tzaj samaʼn tuʼn Kʼloj Xjal Qʼil Twitz Aqʼuntl kyojele ninja tuʼn t-xi tyekʼun kye Kʼloj ansyan toj Ninja qʼil twitz aqʼuntl alkye tten tuʼn tbʼant kyaqʼun (Proverbios 11:14). Toj ambʼil aju, in bʼaj ximet tiʼ kbʼantel ex aju ansyan in tzaj samaʼn in netz tqʼoʼn jun chikʼbʼabʼil tuʼn t-xi tqʼuqbʼaʼn kykʼuʼj qeju in che anqʼin kyojele tnam ateʼkx tjaqʼ tkawbʼil ninja qʼil twitz aqʼuntl.

In xi qʼet onbʼil kye okslal kyojele Ja te Chmabʼil. At junjun ermano toj ninja qʼil twitz aqʼuntl at kyoklen tuʼn tbʼaj ximet qa bʼaʼn tuʼn tbʼaj bʼinchet junjuntl kʼloj okslal (nimel). At junjuntl in xi kyqʼamaʼn tiʼ kbʼantel kyuʼn qeju in che pakbʼan toj tkyaqil ambʼil, kyuʼn qeju in chex samaʼn pakbʼal toj junjuntl tnam ex kyuʼn qeju ansyan in che bʼet kyojele Ja te Chmabʼil, aʼyeju in che ajbʼen tjaqʼ tkawbʼil ninja qʼil twitz aqʼuntl. Ax ikx in bʼaj kyximen tuʼn kyok nimaq chmabʼil, tuʼn kyjaw bʼinchet junjuntl Ja te Chmabʼil, ex in che onen tuʼn kyul uʼj kyojele Ja te Chmabʼil tuʼntzen kyxnaqʼtzan qe erman kyiʼj. Tkyaqilju in bʼant toj jun ninja qʼil twitz aqʼuntl in nonin tuʼn t-xi pakbʼet Tyol Dios toj ttxolil (1 Corintios 14:33, 40).

• ¿Tzeʼn in nonen kʼloj ansyan toj Ninja tiʼj Kʼloj Xjal Qʼil Twitz Aqʼuntl?

• ¿Tiʼ in bʼant toj jun ninja qʼil twitz aqʼuntl?