In yolen Tyol Dios kyiʼj kabʼe kʼloj xinaq, moqa ichan, aʼyeju in che aqʼunan toj ttnam Jehová, «aye nejinel ex aye mojil», moqa onil (Filipenses 1:1, ATM). Chʼixme kyoj kykyaqil Ja te Chmabʼil ateʼ ermano lu. ¿Tiʼ aqʼuntl in bʼant kyuʼn tuʼn kyonen qiʼje?

In che onin tiʼj kʼloj ansyan toj jun Ja te Chmabʼil. Kyxol qeju onil kye ansyan ateʼ kuʼxun ex atqeʼ tij xjal, at jun tbʼanel kyamiwbʼel tukʼe Jehová, jaku tzʼok qʼuqeʼ qkʼuʼj kyiʼj ex in bʼant kyaqʼun. In bʼant junjun aqʼuntl kyuʼn ex in bʼaj kynukʼuʼn junjun tiʼ aju in bʼant tkyaqil maj, naqtzen tuʼnj, nim toklen ex il tiʼj tuʼn tbʼaj bʼinchet toj Ja te Chmabʼil. A jlu in nonen kyiʼj ansyan tuʼn tok kyqʼoʼn kywiʼ tiʼj alkye tten tuʼn kyxi kyxnaqʼtzaʼn qe erman ex tuʼn kyxi qʼolbʼel kye kyja.

In tzaj kyqʼoʼn tbʼanel onbʼil. At junjun onil kye ansyan in xi qʼoʼn kyoklen tuʼn kybʼaj kynukʼuʼn qe ermano ex tuʼn kyokx kykʼamoʼn qeju in che pon toj chmabʼil. Atlo junjuntl in che aqʼunan tiʼj kʼuxbʼil te qʼobʼil tqʼajqʼajel wibʼaj, in che sipen uʼj, in jaw kyiʼn tajlal pwaq toj Ja te Chmabʼil, ex in che onin tuʼn t-xi iqʼet tajlal jatumel che pakbʼal qeju in che ex pakbʼal. Ax ikx in che onin tuʼn tten Ja te Chmabʼil toj tbʼanel. At maj in xi kyqʼamaʼn ansyan kye tuʼn kyonen kyiʼj qeju ma che tijen. Naq tiʼxku kyaqʼun onil kye ansyan in xi qʼoʼn, in kubʼ kybʼinchen tuʼn tkyaqil kyanmi ex iktzun tten in che kubʼ nimen kyuʼn kykyaqil (1 Timoteo 3:13).

In kubʼ kyqʼoʼn jun tbʼanel techel kywitz txqantl. In che jaw jyoʼn qe onil kye ansyan tuʼnju tbʼanel okslalqe. Aj tetz kyqʼoʼn junjun chikʼbʼabʼil kyoj chmabʼil in tzaj kyqʼuqbʼaʼn qkʼuʼje. Aj kykubʼ nej toj pakbʼabʼil in qo tzaj kyonine tuʼn tok tilel quʼne. Tuʼnju onbʼil in tzaj kyqʼoʼn, in qo tzalaje ex in ten mojbʼabʼil qxole (Efesios 4:16). Aj tbʼet ambʼil, ax ikx jaku che ok te ansyan.

• ¿Tzeʼn qe onil kye ansyan?

• ¿Alkye tten in che onen toj Ja te Chmabʼil tuʼn tten tkyaqil toj tbʼanel?