XNAQʼTZBʼIL 18
¿Tzeʼn in chex qonin qermane aj ttzaj nya bʼaʼn kyiʼj?
República Dominicana
Japón
Haití
Aj ttzaj jun nya bʼaʼn, in bʼaj kybʼinchaʼn naj kyten testigos de Jehová tuʼn kyonin kyiʼj kyerman. Aju in bʼant kyuʼn in tzaj tyekʼun qa in nokxix kykʼujlan kyibʼ (Juan 13:34, 35; 1 Juan 3:17, 18). ¿Alkye tten in qo onine?
In chex qonine tukʼe pwaq. Tej ttzaj nim waʼyij toj tnam Judea, aʼye tnejel okslal (nimel) toj tnam te Antioquía xi kysamaʼn pwaq tuʼn kyonin kyiʼj kyerman lu (Hechos 11:27-30). Ax ikx jaʼlo, aj tok qbʼiʼne qa otaq tzaj nya bʼaʼn kyiʼj qermane toj junjuntl tnam, in xi qqʼoʼne onbʼil toj Ja te Chmabʼil tuʼn t-xi samet kye qeju in tzaj nya bʼaʼn kyiʼj (2 Corintios 8:13-15).
In xi qqʼoʼne aju at tajbʼen kye. Aʼyeju ansyan in che anqʼin jatumel in tzaj nya bʼaʼn in che jyon kyiʼj kykyaqil qe erman tuʼn tok kybʼiʼn jatumel ateʼqe ex qa bʼaʼn ateʼqe. At jun kʼloj onil aʼyeju in che kubʼ nej tuʼn t-xi iqʼet wabʼj, tuʼn t-xi iqʼet aʼ aju jaku tzʼajbʼen te kʼabʼj, tuʼn t-xi iqʼet xbʼalun, tuʼn ttzaj jyet jatumel che tel qeju ma tzaj nya bʼaʼn kyiʼj, ex tuʼn kykubʼ qʼanit. At nim (bʼampo) testigos de Jehová in cheʼx onil aʼyeju bʼaʼn jun aqʼuntl kyuʼn, aʼyex in che chojin tiʼjju in bʼaj kyuʼn, ex in che onin kyiʼj qeju otaq tzaj nya bʼaʼn kyiʼj moqa in che onin tuʼn tbʼinchet kyja ex tuʼn kybʼinchet Ja te Chmabʼil. Aju mujbʼabʼil at qxole ex aju qnabʼile ma ten tuʼnju in qo aqʼunane junx, in nonin qiʼje tuʼn t-xi qqʼoʼn naje onbʼil aj ttzaj jun nya bʼaʼn. In qo onine kyiʼj «qe erman», ex at maj in qo onine kyiʼj txqantl xjal te alkyexku okslabʼil (Gálatas 6:10).
In nok qqʼuqbʼaʼne kykʼuʼj tukʼe Tyol Dios. Aʼyeju in tzaj nya bʼaʼn kyiʼj kyajxix tuʼn tok qʼuqbʼet kykʼuʼj. Toj ambʼil aju, in xi tqʼoʼn Jehová kyjwers aju Dios «kukx in tqʼuqbʼaʼn qkʼuʼj» (2 Corintios 1:3, 4). In qo tzalaje aj qyoline tiʼjju in tzaj tqʼamaʼn Tyol Dios kyukʼe qeju in che bʼisen, aj t-xi qyekʼune kye qa chʼixtl tel tiʼn tKawbʼil Dios tkyaqil kʼixkʼej in tzaj tuʼn nya bʼaʼn (Apocalipsis 21:4).
-
¿Tiquʼn jaku txi kyqʼoʼn naj testigos de Jehová onbʼil aj ttzaj jun nya bʼaʼn?
-
¿Tzeʼn in xi qqʼuqbʼaʼne kykʼuʼj qeju in tzaj nya bʼaʼn kyiʼj?
