In che etz nimxix Tuʼjil Tyol Dios (Biblia) quʼne ex txqantl uʼj ex naq kukx in chex qsipene toj tkyaqil abʼqʼi. In che jaw qbʼinchaʼne Ja te Chmabʼil ex ninja qʼil twitz aqʼuntl ex in qo aqʼunane kyiʼj tuʼn kyten toj tbʼanel. In qo onine kyiʼj qeju in che ajbʼen toj Betel, kyiʼj qeju in chex samaʼn pakbʼal toj junjuntl tnam ex kyiʼj qeju in tzaj nya bʼaʼn kyiʼj. Tuʼntzun jlu, jakulo kubʼ t-ximana: «¿Jatumel in tzaj pwaq (tumi) tuʼn tbʼant tkyaqil jlu?».

Mitiʼ in xi qqanine jteʼ pwaq tzul kyqʼoʼn xjal, mitiʼ in xi qqanine tlajajiʼn tiʼj pwaq. Ax tok nim (bʼampo) pwaq in xi tiʼn aqʼuntl in bʼant quʼne tuʼn t-xi pakbʼet tbʼanel tqanil, naqtzen tuʼnj, mitiʼ (tiloʼ) in xi qqanine pwaq. Ma tzikʼ mas jun syent abʼqʼi, aju tkabʼ tajlal uʼj Aju Xqʼuqil etz in tzajtaq tqʼamaʼn qa qʼuqli qkʼuʼje qa a Jehová onil qeye ex qa «mlayx qo moʼne, moqa mlayx txi qqanine pwaq, ex mlayx txi qqʼamaʼne kye xjal tuʼn kyonin qiʼje». ¡Ex mitiʼx o qo moʼne ex mitiʼx o txi qqʼamaʼne kye xjal tuʼn kyonin qiʼje! (Mateo 10:8.)

In bʼant aqʼuntl quʼne tukʼe onbʼil in tzaj qʼoʼn. At nim xjal tbʼanel in nela toj kywitz aju xnaqʼtzbʼil in xi qqʼoʼne tiʼj Tyol Dios ex in tzaj kyqʼoʼn onbʼil tiʼj jlu. Aʼyex testigos de Jehová in che onin tuʼn tkyaqil kykʼuʼj aj t-xi kyqʼoʼn ambʼil, kyjwers ex junjuntl kyqʼinumabʼil tuʼn tbʼant tajbʼil (tvoluntad) Dios twitz tkyaqil Txʼotxʼ (1 Crónicas 29:9). Toj Ja te Chmabʼil ex kyoj nimaq chmabʼil, at junjun tkubʼel pwaq tkubʼ atz jatumel jaku kux tqʼoʼn jun xjal onbʼil qa taj (tgan) tuʼn tonin. Moqa jaku bʼant tuʼn t-xi tqʼoʼn onbʼil toj tembʼil toj Internet, jw.org/mam. Chʼixmi kykyaqil qeju in tzaj kyqʼoʼn onbʼil mebʼa (prow) xjalqe, ik tzeʼn bʼant tuʼn mebʼa xuʼj aju tqʼama Jesús qa tbʼanel aju otaq bʼant tuʼn tuʼnju kux tqʼoʼn kabʼe tal pwaq toj tkubʼel pwaq toj tja Dios (Lucas 21:1-4). Iktzun tten, teyele te junjun «bʼaʼn tuʼn tel tpaʼn chʼin» tuʼn t-xi tqʼoʼn aju «ma kubʼ t-ximan tuj tanmi» (1 Corintios 16:2; 2 Corintios 9:⁠7).

Qʼuqli qkʼuʼje qa kukx kxel tyukun Jehová kyanmi qeju kyaj tuʼn t-xi kyqʼoʼn «nimbʼil te» tukʼe kyqʼinumabʼil tuʼntzen kukx t-xi pakbʼet tKawbʼil, iktzen tten tuʼnx Jehová kbʼantel aqʼuntl (Proverbios 3:9).

• ¿Tiʼ in bʼant quʼne aju junxitl twitzju in bʼant kyuʼn txqantl okslabʼil (nimbʼil)?

• ¿Alkye tten in najbʼen onbʼil in tzaj qʼoʼn?