Qa in xnaqʼtzana tiʼj Tyol Dios kyukʼe testigos de Jehová, in kubʼlo t-xnaqʼtzaʼna xnaqʼtzbʼil naʼmxtaq ttzaj qʼoʼn xnaqʼtzbʼil teya. Ax jlu jaku bʼant tuʼna naʼmxtaq t-xiʼya kyoj chmabʼil tuʼn tok xnaqʼtzbʼil toj twiʼya. Qa ma xnaqʼtzana ik tzeʼn otaq bʼaj t-ximana jaku tzʼonin jlu tiʼja.

Bʼaʼn tuʼn tbʼaj t-ximana jtoj ex jatumel kxnaqʼtzala. ¿Alkye ambʼil mas bʼaʼn tuʼn t-xnaqʼtzana? ¿Aj qsqix, naʼmxtaq t-xi tzyet aqʼuntl, moqa te qonikʼan otaqxi che ikʼ tan kʼwaʼl? Axpe ikx qa mlay xnaqʼtzana nim ambʼil, bʼaʼn tuʼn tkubʼ t-ximana jniʼ ambʼil kxnaqʼtzala ex miʼ tzʼok tqʼoʼn twiʼya tiʼjju in nikʼ. Jyontza jun tembʼil jatumel jaku xnaqʼtzana toj tbʼanel, ex bʼaʼn tuʼn tkubʼ tyupina radio, televisión ex yolbʼil. Qa ma naʼna Dios naʼmxtaq t-xnaqʼtzana, a jlu ok kʼonil tiʼja tuʼn tok tqʼoʼn twiʼya tiʼj Tyol Dios ex tuʼn miʼ ttzaj bʼaj tkʼuʼja tiʼjju in nikʼ toj jun qʼij (Filipenses 4:6, 7).

Qʼoʼnka jun sqit tjaqʼ tzaqʼwebʼil ex bʼaʼn tuʼn t-xi tqʼoʼn tyola. Tuʼn t-xi tzyet xnaqʼtzbʼil tuʼna, tnejel, bʼaʼn tuʼn t-ximana alqiʼj in yolin xnaqʼtzbʼil. Ximana tiʼj tbʼi xnaqʼtzbʼil, ex tiʼ toklen junjun taqikʼ xnaqʼtzbʼil tukʼe ttxuylal xnaqʼtzbʼil, kyiʼj tilbʼilal ex kyiʼj junjun xjel in chex qanit aj tkubʼaj xnaqʼtzbʼil tuʼn kytzaj qnaʼn xnaqʼtzbʼil nimxix kyoklen. Aj tbʼant jlu tuʼna, bʼaʼn tuʼn kykubʼ tuʼjina taqikʼ ex tuʼn kytzaj tjyoʼna tzaqʼwebʼil kye xjelbʼitz. Bʼaʼn tuʼn kykux tjyoʼna texto toj Tyol Dios, ex ximana tiʼ kyoklen jlu tukʼe xnaqʼtzbʼil (Hechos 17:11). Aj kykanet tzaqʼwebʼil tuʼna, qʼoʼnka jun sqit kyjaqʼ junjun yol moqa kyjaqʼ junjun txol yol aʼyeju jaku che onin tiʼja tuʼn ttzaj tnaʼna tzaqʼwebʼil. Jakutzen jaw tiʼn tqʼabʼa toj chmabʼil, qa taja (tgana), ex jaku txi tqʼoʼn jun tyola chʼin tqan tiʼjju kʼelel tnikʼa tiʼj.

Qa ma xnaqʼtzana kyiʼj junxichaq xnaqʼtzbʼil in che kubʼ xnaqʼtzet kyoj chmabʼil toj junjun seman, kukx kʼokel tchmoʼn teya «tqʼinumabʼl» aju tojtzqibʼila tiʼj Tyol Dios (Mateo 13:51, 52).

• ¿Tiʼ kbʼantel tuʼna tuʼn t-xnaqʼtzana naʼmxtaq t-xiʼya kyoj chmabʼil?

• ¿Tiʼ jaku tzʼonin tiʼja tuʼn t-xi tqʼoʼn jun tyola toj chmabʼil?