Xi tqʼamaʼn Jesús jlu kye qeju lepchiqeʼk tiʼj: «Tuʼn tkʼant kyspikʼumale kywitz xjal, tuʼn kylonte aju kyaqʼunbʼene bʼaʼn ex tuʼn tjaw kynimsaʼn tbʼi kymane aju at tuj kyaʼj» (Mateo 5:16). Tuʼntzunju, in che ajbʼen kʼuxbʼil quʼne aʼyeju tzma in che etz kyuʼn xjal, ik tzeʼn Internet. Aju qtembʼile toj Internet jw.org/mam o tzaj qʼoʼn toklen tuʼn t-xi qʼet tqanil qxnaqʼtzbʼile ex tkyaqil aqʼuntl in bʼant quʼne. ¿Tiʼ at toj?

Aju tzaqʼwebʼil in tzaj tqʼoʼn Tyol Dios kye xjelbʼitz. Jaku che kanet tzaqʼwebʼil tuʼna te junjun xjel nimxix toklen aju o che ximen xjal tiʼj. Jun techel, aʼyeju tal uʼj ¿Kpolpetzele jun qʼij jatumel miʼn tzajtl yajbʼil qiʼj? ex ¿Jakupe che jaw anqʼin juntl maj kyimni? tkubʼ toj Internet toj mas te 600 yol. Ax ikx jaku kanet tuʼna aju Traducción del Nuevo Mundo toj mas te 130 yol ex jaku kanet nimku onbʼil tuʼna tuʼn tkubʼ xnaqʼtzet Tyol Dios, ik tzeʼn uʼj ¿Tiʼ in tzaj t-xnaqʼtzaʼnxix Tyol Dios? Ex jaku che kanet tuʼna aʼyeju uʼj Aju Xqʼuqil ex ¡Despertad! aʼyeju tzma in che etz. Nim kyxol qe jlu jaku che kubʼ quʼjin moqa jaku che ok qbʼiʼn toj Internet, moqa jaku che kutz qiʼn kyoj formato mas ojtzqiʼn qe ik tzeʼn MP3, PDF moqa EPUB. Axpe ikx jaku tzʼetz tiʼna junjun t-xaq uʼj toj kʼuxbʼil toj tyol alkyexku xjal aju taj tuʼn tok tbʼiʼn Tyol Dios. At nim video kye qeju men ex chkin te nimku tnam. Jaku che kutz tiʼna txʼolbʼabʼil in che jaw uʼjet toj Tyol Dios, ax ikx jaku che kutz tiʼna txʼolbʼabʼil o che bʼaj bʼinchaʼn tuʼn tok qbʼiʼn tiʼj Tyol Dios ex jaku che kutz tiʼna aʼyeju tbʼanelxix tqʼajqʼajel twiʼ chnabʼ te bʼitzbʼil tuʼn tok tbʼiʼna aj tten ambʼil tiʼja.

Aju ax tok tqanil kyiʼj testigos de Jehová. Ax ikx kkanetel junjun tqanil tuʼna tukʼex video tiʼjju tzma in nikʼ aju at toklen tukʼe aqʼuntl in bʼant kyuʼn testigos de Jehová twitz tkyaqil Txʼotxʼ, aʼyeju tqanil in che yolin tiʼjju in nikʼ kyiʼj ex tiʼjju onbʼil in xi kyqʼoʼn aj ttzaj nya bʼaʼn kyiʼj kyerman. Jaku kanet tqanil tuʼna kyiʼj nimaq qchmabʼile che okel ex jaku kanet tqanil tuʼna tiʼj alkye tten jaku yolina kyukʼe qeju in che ajbʼen kyoj ninja qʼil twitz aqʼuntl.

Iktzun tten, in nok tilel quʼne tuʼn tkʼant t-spikʼumal axix tok twitz tkyaqil Txʼotxʼ. In nonin jlu kyiʼj xjal toj tkyaqil plaj twitz Txʼotxʼ, axpe ikx toj cheʼw txʼotxʼ aju najchaq, moqa laqʼche, taʼ aju Antártida tbʼi. In qo naʼne Dios tuʼn «tel laqʼeʼ mas tqanil tyol Qajaw» twitz tkyaqil Txʼotxʼ tuʼn tjaw nimset Dios (2 Tesalonicenses 3:1).

• ¿Alkye tten in nonin tembʼil jw.org/mam kyiʼj txqantl xjal tuʼn tel kynikʼ tiʼj axix tok toj Tyol Dios?

• ¿Tiʼ taja tuʼn tok tqʼoʼn twitza tiʼj toj qtembʼile toj Internet?