Aju yol Betel jun bʼibʼaj toj hebreo, a t-xilen jlu: «Tja Dios» (Génesis 28:17, 19). Tbʼanelxix tuʼn tok jlu te kybʼi qeju ninja o che kubʼ kybʼinchen testigos de Jehová twitz tkyaqil Txʼotxʼ atz jatumel in xi onit ex in xi qʼamet alkye tten tuʼn t-xi pakbʼet Tyol Dios. Aju Kʼloj Xjal Qʼil Twitz Aqʼuntl in najbʼen toj kytxuylal ninja qʼil twitz aqʼuntl atz Nueva York (Estados Unidos), ex toj kytxuylal ninja in tzaj qʼamaʼn alkye tten kbʼantel aqʼuntl kyoj ninja qʼil twitz aqʼuntl kyoj nimku (bʼampo) tnam. Aʼyeju in che ajbʼen toj Betel ik kyten ik tzeʼn jun ja xjal, in che anqʼin junx, in che aqʼunan junx, in che waʼn junx ex in che xnaqʼtzan tiʼj Tyol Dios junx (Salmo 133:1).

Jun tbʼanelxix najbʼil jatumel in che aqʼunan junx tukʼe tkyaqil kykʼuʼj. Kyoj kykyaqil ja Betel ateʼ xinaq, moqa ichan, ex xuʼj (qya) aʼyeju in che ajbʼen te Dios toj tkyaqil ambʼil (Mateo 6:33). Nijun kyxol qe jlu in tzaj chjoʼn twi kykʼuʼj, naqtzun tuʼnj, in tzaj qʼoʼn jatumel tuʼn kyten, in tzaj qʼoʼn kywa, ex in tzaj qʼoʼn chʼin onbʼil kye toj junjun xjaw (qyaʼ) tuʼn tlaqʼet aju at tajbʼen kye. Kykyaqil qeju ateʼ toj Betel at jun kyaqʼun, at junjun in che aqʼunan tiʼj uʼj, at junjuntl in che bʼinchan wabʼj moqa in che aqʼunan jatumel in che waʼn kykyaqil. At txqantl in che aqʼunan kyiʼj kʼuxbʼil jatumel in che etz uʼj moqa in che aqʼunan tuʼn tok qʼet kyxkʼomel uʼj, ax ikx at junjuntl in che aqʼunan tuʼn tjaw tzʼis, tuʼn ttxʼjet xbʼalun, tuʼn tten ja Betel toj tbʼanel ex tuʼn tbʼant junjuntl aqʼuntl.

Jun najbʼil jatumel at nim aqʼuntl tuʼn t-xi pakbʼet tkawbʼil Dios. Aju aqʼuntl nim toklen in bʼant kyoj ja Betel aju tuʼn t-xi xnaqʼtzet axix tok (bʼaʼn ax) tkuʼx toj Tyol Dios te alkyexku xjal. Jun techel, aju uʼj lu. Tej tkubʼ bʼinchet ok tqʼoʼn twitz Kʼloj Xjal Qʼil Twitz Aqʼuntl tiʼj, xi samet kye nimku kʼloj xjal twitz tkyaqil Txʼotxʼ tuʼn tkubʼ kyqʼoʼn kyoj txqantl yol, etz bʼinchet kyoj kʼuxbʼil kyoj nimku Betel atz jatumel at junjun tbʼanelxix kʼuxbʼil aju lwey in che etz naj uʼj tuʼn ex xi samet kye mas te 110.000 kʼloj okslal (nimel). At kyoklen kykyaqil qeju in che aqʼunan toj Betel tuʼn tbʼant tkyaqil jlu tuʼntzen t-xi pakbʼet tbʼanel tqanil aju aqʼuntl mas nim toklen tuʼn tbʼant (Marcos 13:10).

• ¿Alkyeqe in che ajbʼen toj Betel ex tiʼ in tzaj qʼoʼn kye?

• ¿Alkye aqʼuntl mas nim toklen in xi kyonin qeju in che ajbʼen toj Betel?