XNAQʼTZBʼIL 23
¿Alkye tten in che kubʼ tzʼibʼet quʼje ex in che kubʼ qʼet kyoj txqantl yol?
Kʼloj Tzʼibʼel (Estados Unidos)
Corea del Sur
Armenia
Burundi
Sri Lanka
In nok tilil quʼne tuʼn t-xi pakbʼet «tqanil kolbʼil [...] kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam», tuʼntzun jlu, in che etz uʼj quʼne kyoj mas te 750 yol (Apocalipsis 14:6). ¿Alkye tten in bʼant tkyaqil aqʼuntl lu quʼne? In bʼant jlu quʼne tuʼnju onbʼil in tzaj kyqʼoʼn jun kʼloj tzʼibʼel uʼj kyoj nimku (bʼampo) tnam ex tuʼnju onbʼil in tzaj kyqʼoʼn jun kʼloj aqʼunal tuʼn kykubʼ uʼj kyoj txqantl yol, kykyaqil qe jlu testigos de Jehová qe.
Tnejel in kubʼ bʼinchet uʼj toj inglés. In nok tqʼoʼn twitz Kʼloj Xjal Qʼil Twitz Aqʼuntl tiʼj Kʼloj Tzʼibʼel atz toj kytxuylal ninja qʼil twitz aqʼuntl. Aju Kʼloj Tzʼibʼel in xi t-sipin kyaqʼun qeju txqantl tzʼibʼel aʼyeju in che ajbʼen toj kytxuylal ninja ex aʼyeju in che ajbʼen kyoj junjuntl ninja qʼil twitz aqʼuntl. Tuʼnju at jun Kʼloj Tzʼibʼel te nimku tnam in che kubʼ qqʼoʼne xnaqʼtzbʼil kyoj quʼje aju at toklen kyukʼe xjal te nimku tnam, tuʼntzunju tbʼanel in che ela quʼje toj kywitz xjal te nimku tnam.
In xi samet aju otaq bʼaj tzʼibʼet kye qeju in kubʼ kyqʼoʼn uʼj kyoj txqantl yol. Aj tbʼaj tzʼibʼet jun uʼj ex aj ttzaj qʼamaʼn qa bʼaʼn taʼ, in xi samet toj Internet kye kykyaqil qeju in kubʼ kyqʼoʼn uʼj kyoj txqantl yol twitz tkyaqil Txʼotxʼ, aʼyeju in che kubʼ kyqʼoʼn uʼj kyoj txqantl yol, in nok kyqʼoʼn kywitz tiʼj qa a ximbʼetzju in kubʼ qʼet ex qa atx chʼintl ximbʼetz mitiʼ (tiloʼ) xkubʼ qʼet in kubʼ kytzʼaqsaʼn. In nok tilil kyuʼn tuʼn kyjyet «qe yol tuj ttxolil ex axix tok» tuʼntzen tikʼx kyqʼoʼn aju ximbʼetz toj inglés toj kyyol (Eclesiastés 12:10).
In che onin qe computadora tuʼn tbʼant naj aqʼuntl. Aju taqʼun jun tzʼibʼel ex aju taqʼun jun xjal in che kubʼ tqʼoʼn uʼj toj juntl yol, mlay bʼant tuʼn jun computadora. Naqtzun tuʼnj, jaku bʼant naj aqʼuntl qa ma tzʼajbʼen computadora kyuʼn. Aju Sistema Electrónico de Edición Plurilingüe (MEPS, aʼyeju letra lu atz tzajniqe toj inglés), o bʼaj kybʼinchaʼn testigos de Jehová jatumel jaku che kubʼ qʼet uʼj kyoj nimku yol atz jatumel jaku che kubʼ qʼet yol junx kyukʼe qe tilbʼilal ex jatumel jaku bʼaj bʼinchet tuʼn tetz toj kʼuxbʼil.
¿Tiquʼn in nok tilil quʼne tuʼn kyetz uʼj kyoj nimku yol, axpe ikx kyoj qeju yol nya nimtl xjal in najbʼen kyuʼn? Tuʼnju tajbʼil Jehová «tuʼn kyklet kykyaqil xjal ex tuʼn tel kynikʼ tiʼj ju yol axix tok» (1 Timoteo 2:3, 4).
-
¿Alkye tten in che kubʼ tzʼibʼet quʼje?
-
¿Tiquʼn in nok tilil quʼne tuʼn kyetz uʼj kyoj nimku yol?
