¿Taja (tgana) tuʼn ttzaj tjyoʼna chʼintl tqanil tuʼn tchʼiy tojtzqibʼila tiʼj Tyol Dios? ¿At jun t-xjelbʼitza tiʼj jun taqikʼ Tyol Dios, tiʼj jun xjal, tiʼj jun tnam moqa tiʼj juntl tiʼ aju in yolin Tyol Dios tiʼj? ¿Moqa o kubʼ t-ximana qa jaku tzʼonin Tyol Dios tiʼja aj tok weʼya twitz jun nya bʼaʼn? Qa ikju, bʼaʼn tuʼn t-xiʼya jyol tqanil kyoj uʼj kʼuʼnqe toj Ja te Chmabʼil.

In qo tzaj kyonin tuʼn tjyet tqanil quʼn. Ax tok mitiʼlo teya tkyaqil uʼj tukʼe aʼyeju o che etz kyuʼn testigos de Jehová tojx teya tyol. Naqtzen tuʼnj, toj kʼubʼil uʼj at toj Ja te Chmabʼil at chʼixmi tkyaqil uʼj kʼitzqeku che etz. Ax ikx at junjuntl Tuʼjil Tyol Dios (Biblia) toj aʼyeju o che etz kyuʼn junjuntl xjal, at jun tbʼanel pujbʼil yol ex at junjuntl uʼj te jyobʼil tqanil. Jaku che ajbʼen uʼj lu tuʼna naʼmxtaq t-xi tzyet moqa aj tel bʼaj chmabʼil. Qa at jun computadora, atle Watchtower Library toj, atz jatumel tokx nimku (bʼampo) uʼj o che etz quʼne ex at jun onbʼil tokx toj aju jaku tzʼonin tuʼn tkanet naj jun xnaqʼtzbʼil, jun yol moqa jun taqikʼ Tyol Dios.

In nonin kyiʼj qeju xnaqʼtzal ateʼ toj chmabʼil Kyanqʼibʼil Okslal ex Kypakbʼabʼil. Jaku che ajbʼen uʼj tuʼna aʼyeju kʼuʼnqe toj Ja te Chmabʼil tuʼn tbʼaj tbʼinchen ttena qa at jun toklena. Aju ansyan tiʼj chmabʼil Kyanqʼibʼil Okslal ex Kypakbʼabʼil in xqʼuqin kyiʼj qeju uʼj kʼuʼnqe. A in xqʼuqin qa atqeʼ uʼj kʼitzqeku kyetzlen ex qa nukʼuʼn kyten. Jaku tzʼonin ansyan moqa aju in qʼon xnaqʼtzbʼil teya tuʼn tkanet tuʼna aju tqanil in jyona tiʼj. Naqtzun tuʼnj, mlay bʼant tuʼn kyetz qiʼn uʼj lu toj Ja te Chmabʼil. Ex nya bʼaʼn tuʼn tkux qsqitin kyoj tuʼnju qaj tuʼn kyok qxqʼuqin.

In tzaj tqʼamaʼn Tyol Dios qa «tuʼn tojtzqinteya Dios», ilxix tiʼj tuʼn tjyona tiʼj ojtzqibʼil tiʼj Dios «ik tzaʼn in jyona tiʼj saq pwaq ex qa jun qʼinumabʼl» (Proverbios 2:1-5). Aʼyeju uʼj kʼuʼnqe toj Ja te Chmabʼil jaku tzʼonin tiʼja tuʼn tkanet ojtzqibʼil lu tuʼna.

• ¿Alkyeqe onbʼil jaku che kanet quʼn toj kʼubʼil uʼj toj Ja te Chmabʼil?

• ¿Alkye jaku tzʼonin tiʼja tuʼn tkanet tqanil tuʼna toj kʼubʼil uʼj?