¿Ma tzʼok tqʼoʼn twitza kyiʼj tilbʼilal toj uʼj lu jatumel in tzaj yekʼun aju tbʼanel kyxbʼalen testigos de Jehová in nok aj kyxiʼ toj chmabʼil? ¿Tiquʼn in bʼaj qxbʼalumin qibʼe toj tumel?

In kubʼ qyekʼune qa in jaw qnimsaʼne Dios. Ax tok (bʼaʼn ax) nya oʼkx in nok tqʼoʼn Dios twitz tiʼj qxbʼalun (1 Samuel 16:7). Naqtzun tuʼnj, aj tok qchmon qibʼe tuʼn tjaw qnimsaʼne Dios, qaje (qgane) tuʼn tkubʼ qyekʼune qa in jaw qnimsaʼne tuʼn tkyaqil qanmiye ex qaje tuʼn tkubʼ qyekʼune qa nim kyoklen qermane toj qwitze. Qa ma qoʼx twitz jun jwes, tuʼnju nim toklen xjal lu, okle kʼokel qqʼoʼn tbʼanel qxbʼalun. Ax ikx aju alkye tten in nok qxbʼalumin qibʼe aj qxiʼye kyoj chmabʼil in kubʼ qyekʼune qa nim toklen toj qwitze aju «jwes kyibʼaj kykyaqil xjal twitz txʼotxʼ», aju Jehová, ex aju jatumel in nok qchmon qibʼe (Génesis 18:25).

In xi tyekʼun qa at toklen aju in qo xnaqʼtzane tiʼj. In tzaj tqʼamaʼn Tyol Dios kye okslal (nimel) tuʼn tok kyqʼoʼn «kyxbʼalin tbʼanilx ex toj tumil» (1 Timoteo 2:9, 10, ATM). Aju tuʼn tok qqʼoʼn jun qxbʼalun «tbʼanilx ex toj tumil» a t-xilen jlu: tuʼn tel qikʼen tkyaqil xbʼalun aju jaku tzʼok bʼaj kyqʼoʼn kywitz xjal tiʼj, aju jitzʼ, aju qʼanchaʼl tchibʼjil xjal toj ex aju nya bʼaʼn. Mitiʼ in tzaj kyyekʼun kawbʼil lu qa mlay che jaw qjyoʼn tbʼanel qxbʼalun. Nya tuʼn jun yol jaku tzʼel «kynikʼ xjal qa tbʼanilxix t-xnaqʼtzbʼil Dios aju Klol qe» ex nya tuʼn jun yol kyjawil «kynimsaʼn tbʼi Dios» naq oʼkx tuʼnju qa ma bʼaj qxbʼaluminxix qibʼ (Tito 2:10; 1 Pedro 2:12). Qa tbʼanel qxbʼalune sok qqʼoʼne aj tok qchmon qibʼe a jlu kxel tyekʼen kye xjal qa nimxix toklen aju tuʼn qajbʼene te Jehová.

Miʼn kubʼ t-ximana qa mlay txiʼya kyoj chmabʼil naq tuʼnju mitiʼ jun tbʼanel t-xbʼaluna. Nya il tiʼj tuʼn t-xiʼ nim (bʼampo) pwaq tiʼj qxbʼalun, naq oʼkx qa txʼjoʼn tiʼj ex qa bʼaʼn tten.

• ¿Tiquʼn nim toklen aju alkye tten in nok qxbʼalumin qibʼe aj qxiʼye kyoj chmabʼil?

• ¿Alkyeqe kawbʼil che onil qiʼj tuʼn tjaw qjyoʼn qxbʼalun?