Qa ma tzʼoke te tamiw qMan Dios atzan tbʼanilxixjo jaku ten teye. Kbʼel xnaqʼtzaʼna tuʼn qMan Dios tzaʼn jaku kanet tzalajbʼil ex xqʼuqbʼel tuʼne; ax ktzoqpajela tiʼj nim xnaqʼtzbʼil nya axix tok ex bʼinchbʼen mya bʼaʼn aqejo ntzaj yajbʼil kyuʼn. Ktzajel tbʼiʼn tnaʼj Diosa. Ax tzul tqʼoʼn tzalajbʼil tuj tanmiye ex qʼuqbʼil tkʼuʼja tiʼjxa (Salmo 71:5; 73:28). Ex tzul oniye tuʼn qMan Dios aj ttzaj kʼixkʼoj tuj tanqʼibʼila (Salmo 18:18). Nya oʼkxjo, ax nxiʼ ttziyen qMan Dios jun oyaj teya aju chwinqlal te jumajx (Romanos 6:23).

Qa ma qo ok laqʼe tkʼitz qMan Dios ax nqo ok laqʼe ktxlaj tamiw. Ayeʼ tamiw qMan Dios ok chi okel te tamiwe. Ikxix tzeʼnqeʼ ttzike ex titzʼine. Ok chi tzalajel aj tkubʼ xnaqʼtzaʼne kyuʼn tiʼj qMan Dios ex kxel onine kyuʼn tuʼn tok tilil tuʼne.

Nyaʼ ikqoʼ tzaʼn qMan Dios. Qa ma qjyom qamiwbʼel tukʼe qMan Dios at jun iltiʼj tuʼn tel qnikʼ tiʼj: aju qamiwbʼel tukʼe qMan Dios nya ik tzaʼn qamiwbʼel qxolx. Quʼn a te qMan Dios at nimxix tabʼqʼi, nimxix tnabʼl ex nimxix tipumal qwitz. Oʼkxkute at toklen tuʼn tok te qKawil. Tuʼntzunjo, qa qaj tuʼn qok te tamiw iltiʼj tuʼn t-xi qbʼiʼn ex tuʼn tkubʼ qbʼinchen aju ntzaj tqanin qe. Qexju tbʼanel tzul qa ma txi qbʼiʼn qMan Dios (Isaías 48:18).