Aju tnejel ajqʼoj tiʼj qMan Dios a Satanás aju tajaw il. Jun xewbʼaj teʼ aju ok te mya bʼaʼn ok meltzʼaj tiʼj Jehová. A Satanás kukx nqʼojin tiʼj qMan Dios ex ntzaj nim tiʼchaq mya bʼaʼn kyiʼj kkyaqil xjal tuʼn. A Satanás jun xewbʼaj aj il, nikyʼil yol mo iqel yol (chal yol) ex bʼiyol (Juan 8:44).

Txqantl anjeles ok kmujbʼan kyibʼ tukʼe Satanás ex e ok meltzʼaj tiʼj qMan Dios. A Xjan Uʼj in nok tqʼoʼn kbʼi te taqʼunal tajaw il. Ik qeʼx tzaʼnj Satanás ajqʼojqeʼ kyiʼj xjal. Nchi tzalaj tiʼj mya bʼaʼn in nok kbʼinchen kyiʼj xjal (Mateo 9:32, 33; 12:22). Kbʼel tnajsaʼn Jehová Satanás kyukʼeqex taqʼunal te jumajx. Noq chʼintl ambʼil at kye tuʼn tok kbʼinchaʼn mya bʼaʼn kyiʼj xjal (Apocalipsis 12:12).

Qa qajbʼil tuʼn qok te tamiw qMan Dios, mintiʼ tuʼn tkubʼ qbʼichaʼn aju taj Satanás tuʼn tbʼant quʼn. Ikʼoʼn Jehová tuʼn Satanás ex kyuʼn taqʼunal mo ntxʼaʼl kkʼuʼj tiʼj. Ayetzun ajqʼojqejo tiʼj qMan Dios ax kyaj tuʼn qok ik tzeʼnj kye. Tuʼntzunju, iltiʼj tuʼn tjaw qskʼoʼn alqe qajxix tuʼn qajbʼen: te Satanás mo te Jehová. Qa qaj tuʼn qanqʼin te jun majx, iltiʼj tuʼn t-xi qximen tuʼn tbʼant tajbʼil qMan Dios quʼn. Nkanet nim ttxolil tuʼn Satanás tzaʼn tuʼn kkubʼ tsbʼuʼn xjal ix in najbʼen nim tramp tzeʼn tuʼn kkubʼ tzʼaq tuj tqʼobʼ. Iktzun nchi kubʼ tsbʼuʼn nim xjaljo (Apocalipsis 12:9).