A Jesucristo tKʼwal Jehová nqaku tok ttxlaj, atzun jun tamiwjo kʼujlaʼnxix tuʼn. Tej naʼmxtaq tul tzalu twitz Txʼotxʼ ik tzeʼnj jun xinaq, anqʼin Jesús toj kyaʼj jun xewbʼajteq nim tipumal (Juan 17:5). Ex ultzun twitz Txʼotxʼ tuʼn kkubʼ t-xnaqtzaʼn xjal tiʼjjo axix tok tiʼj qMan Dios (Juan 18:37). Nya oʼkxjo, ax ikx xi tqʼoʼn tchwinqlal tuʼn kklet qeʼ xjal in nokx kbʼiʼn qMan Dios tiʼj il ex kyimen (Romanos 6:23). Atzuntl jaʼlin ajKawiltl te Jesús tuj tKawbʼil qMan Dios tuj kyaʼj, aju kbʼel tbʼinchan twitz Txʼotxʼ te Tbʼanel Najbʼil te Tzalajbʼil (Apocalipsis 19:16).

Ax ikx qeʼ anjeles tamiw qMan Diosqeʼ. Mitiʼ xi qe kchwinqlal anjeles tzalu twitz Txʼotxʼ ik tzeʼnj kye xjal. Atz e kubʼ bʼinchan toj kyaʼj tej bʼajxtaqʼ kubʼ tbʼinchan qMan Dios Txʼotxʼ (Job 38:4-7). Nimxix kbʼet anjeles at (Daniel 7:10). Aqejo tamiw qMan Dios lu, kyajbʼil tuʼn tel kynikʼ xjal tiʼjju axix tok tiʼj Jehová (Apocalipsis 14:6, 7).

Ax atqeʼ tamiw qMan Dios twitz Txʼotxʼ; in nok tqʼoʼn kbʼi te ttestigos. Jun testiw tok twitz jun juez nxiʼ tqʼamaʼn aju ojtzqiʼn tuʼn tiʼj jun xjal mo tiʼj tiʼchaq. Aqe testigos de Jehová nchi yolin tiʼj Jehová ex tiʼj t-xim kye txqantl xjal (Isaías 43:10). Ik tzeʼnj nbʼant kyuʼn anjeles, ax ikx qeʼ Testigos kyajbʼil tuʼn kyonin tiʼja tuʼn tel tnikʼa tiʼjjo axix tok tiʼj Jehová. Ax kyajbʼilxix tuʼn toka te tamiw qMan Dios.