Mlay tzʼok Tbʼanel Najbʼil te Tzalajbʼil ik tzaʼnj twitz txʼotxʼ jaʼlen. Nyaʼteq taj qMan Dios tuʼn tnoj twitz txʼotxʼ tukʼe nim mya bʼaʼn ex kʼixkʼoj. Tuj ambʼil tzul kbʼel tbʼinchan qMan Dios Txʼotxʼ te Tbʼanel Najbʼil te Tzalajbʼil. Tzeʼn kʼokila? Qkikuʼx mo qkayinkuʼx tiʼ ntzaj t-xnaqʼtzaʼn Xjan Uʼj tiʼj jlu.

Ok chi anqʼil tbʼanel xjal. Aju Tbʼanel Najbʼil te Tzalajbʼil kʼokil te kyanqʼibʼil tamiw qMan Dios. Eyeʼ xjal lu kbʼel kbʼinchan tiʼchaq tbʼanel kxolx ex ok chi bʼetil tuj jiqinxix tbʼe Jehová (Proverbios 2:21).

Ktel nim wabʼj. Tuj Tbʼanel Najbʼil te Tzalajbʼil mix aʼlx jun ktel waʼyij tiʼj. Ntqʼmaʼn Xjan Uʼj: ‹Kchmetel nim twitz triw mo wabʼj twitz Txʼotxʼ› (Salmo 72:16).

Ktel tbʼanel kyja ex tbʼanil kyaqʼun xjal. Kkyaqil jaxjal teyelex te junjun ktel tja tuj Tbʼanel Najbʼil te Tzalajbʼil twitz Txʼotxʼ, ex chi tzalajel tiʼj tbʼanil kyaqʼun ktel (Isaías 65:21-23).

 Ktel mujbʼabʼil twitz tkyaqil txʼotxʼ. Melayx tzʼoktl bʼiybʼel ex mix aʼlxtl jun xjal kkyimel tuj nimaq qʼoj. A Xjan Uʼj nqʼmante: ‹Nweʼ tkyaqil matij qʼoj tuʼn qMan Dios› (Salmo 46:8, 9).

Ktel tbʼanel chwinqlal. A Xjan Uʼj ntzaj ttziyen: «Mi jun xjal najl tuj tnam [mo Tbʼanel Najbʼil te Tzalajbʼil] ok tmaʼ kyjaʼ: Yabʼ qine» (Isaías 33:24). Mi chi tentl kox, moẍ, chkyin nix men mo eyeʼ min nbʼant kyolin (Isaías 35:5, 6).

Miʼ tentl bʼis, kʼixkʼej nix kimen. A Tyol qMan Dios nqʼmante: «Mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porque aqeju at tnejel ma che naj» (Apocalipsis 21:4).

Miʼ chi tentl xjal mya bʼaʼn kbʼinchbʼen. Ntzaj ttziyen Jehová: «Atzun qeju bʼinchal mya bʼaʼn ex qeʼ aj il, bʼiʼx che elex lajoʼn tuj [Txʼotxʼ] ex mintiʼ kyoklen tiʼj» (Proverbios 2:22).

Kʼokil kkʼujlaʼn kyibʼ xjal ex kʼokix kbʼiʼn kyibʼ kxolx. Min tzʼok kbʼinchentl nya jiqin kyiʼj xjal, mi chi kubʼ jtzʼoʼntl ex mix aʼlxtl kpol tkʼuʼj tiʼj tiʼchaq kye kyukʼil ex miʼ tentl ikʼbʼil kxol. Aqe xjal ok chi anqʼil junx ex ok chi bʼetil tuj jiqon tbʼe qMan Dios (Isaías 26:9).