Qa at jun qamiw tbʼanel in nela toj qwitz ex in nokx qbʼiʼn, in nok tilil quʼn tuʼn qok ik tzaʼnj te. ‹Tbʼanel ex tzʼaqlixix te qMan Jehová›, chi Xjan Uʼj (Salmo 25:8). Tuʼn qok te tamiw qMan Dios, iltiʼj tuʼn qok te jiqin ex tbʼanel xjal. A Xjan Uʼj nqʼamante: «Kykanoʼmile tiʼj Dios, porque tkʼwaʼl Dios qeye, kʼujlaʼnxix qeye tuʼn, kukx kykʼujlam kyibʼe» (Efesios 5:1, 2). Atzun junjunqeʼ techal jlu tzaʼn jaku tzʼel qkanoʼn tiʼj qMan Jehová:

Qo onin kyiʼj txqantl. «Qbʼincham bʼaʼn kye kykyaqil.» (Gálatas 6:10.)

Qo ok te tbʼanel aqʼunal. «Aju bʼaʼn tzʼelqʼan nej, miʼn tzʼelqʼantl, noq oʼkx tuʼn taqʼnan tuʼn tqʼabʼ tuʼn tbʼinchante jun aqʼuntl tuj tumelxix.» (Efesios 4:28.)

Qsaqinku tuj tkyaqil tten qanqʼibʼil. ‹Qtxʼjomel tkyaqilju in tzʼilsante qchibʼjal ex in tzʼilsante qanmi; ex qo ok te xjan mo saqxix tuj tchiylal Dios.› (2 Corintios 7:1.)

 Iltiʼj tuʼn kyok qkʼujlaʼn ex tuʼn kyokx qbʼiʼn qeʼ nchi anqʼin tuj qja. «Teyle junjun kyeye kʼujlam t-xuʼjil ik tzaʼn in tkʼujlan tibʼ, ax ikx te xuʼj nimanx tchmil. Aqeye kʼwaʼlbʼaj, kynimanxe kymane.» (Efesios 5:33-6:1.)

Chi qkʼujlam qeʼ txqantl. «Qkʼujlam qibʼ qxolx, porque aju qkʼujlalil te Dioste.» (1 Juan 4:7.)

Qbʼinx qeʼ kawbʼil nkubʼ ktzʼibʼin ajkawil te tnam. ‹Kyqʼonkx kybʼa tjaqʼ kawil tzaluʼn twutz txʼotxʼ [...] ex kychjonxjiʼy tkyaqil kykʼasa, jaʼ kʼasbʼena kyuʼne tzeʼnku chojbʼil te kawil.› (Romanos 13:1, 7, MC.)