Taj Satanás tuʼn tkubʼ qbʼinchen aju tiʼchaq nbʼant kyuʼn chman. Nim xjal nkubʼ kqʼoʼn oyaj kye kxeʼchil mo kyanmi kyimne, tuʼn miʼn tok kbʼinchan mya bʼaʼn kyiʼj. Nkubʼ kbʼinchen quʼn nchi xobʼ tuʼnjo kyanmi mo kxew kyimni. Eyeʼ xjal lu qʼiʼn kxmilqʼobʼ ex qʼiʼn kyuʼ tjaqʼ kyqul, ax ikx nxiʼ kkʼaʼn qʼanbʼil ex in nok ksuʼn kyiʼj, nxi kximen qa at tipumal jlu tuʼn tonin kyiʼj. Junjuntl xjal nxi kewin tiʼchaq tuj kyja moqa nkuʼx kmuquʼn, tuʼnjo nxi kximin qa at kipumal tuʼn kkolin kyiʼj. Junjunqetl in najbʼen qʼanbʼil kyuʼn ik tzeʼnj in najbʼen kyuʼn chman mo ajqʼij, nxi kximin qa jaku chi tzaj onin kyuʼn tuj kkʼaybʼil, aj kyok tuj malbʼil tiʼj kyojtzqibʼil tuj tja xnaqʼtzbʼil ex aj t-xmoxin jun qʼa tiʼj jun txin.

Oʼkx qa ma qo ok te tamiw Jehová, qo kletel tuj tqʼobʼ Satanás. Nimxix tipumal Jehová kyukʼe t-anjeles twitzj te Satanás kyukʼe taqʼunal (Santiago 2:19; Apocalipsis 12:9). Nim tajbʼilxix Jehová tuʼn tajbʼen tipumal te kolbʼil qeʼ tamiw, eyeʼ tzʼaqlixixqeʼ tukʼil (2 Crónicas 16:9).

A Tuʼjil Tyol qMan Dios nqʼamante: «Miʼn bʼaj kxnaqʼtzaʼn kyibʼe tuʼn tbʼant kyqʼijine». In nel tikʼen Jehová ajpomal mo ajyoʼẍil quʼn ayeʼ bʼinchbʼen lu nqo okx kyqʼoʼn tjaqʼ tipumal Satanás aju tajaw il (Levítico 19:26).