Nqo ok tuj joybʼil tuʼn Satanás tuʼn tkubʼ qbʼinchan mya bʼaʼn. Qa qajbʼilxix tuʼn qok te tamiw qMan Dios, iltiʼj tuʼn tel qikʼen aju in nel tikʼon Jehová (Salmo 97:10). Atzun junjunqeʼ tiʼchaq jlu iltiʼj tuʼn tel kyikʼon tamiw qMan Dios:

Nchi bʼinchen il tukʼe kxmilal. «Miʼn kybʼinchaye ajpajil.» (Éxodo 20:14.) Aj tkubʼ kuẍeʼ jun qʼa tukʼe jun txin qa naʼmxtaq kmujeʼ, jun il jlu tuj twitz qMan Dios (1 Corintios 6:18).

Txʼujtel. «Qeʼ kʼal [nim] qʼeʼn [...] mintiʼ kyoklen tiʼj tkawbʼil Dios» (1 Corintios 6:10).

Bʼiyol ex ikʼsel mo in nel kyiʼn kyal. «Miʼn che bʼiyune.» (Éxodo 20:13.)

Elqʼal. «Miʼn che elqʼane.» (Éxodo 20:15.)

Nya axtok yol. In nel tikʼon Jehová ‹xjal nikʼal yol› (Proverbios 6:17).

 Bʼiyil ex qʼojil. A Jehová ‹in che el tikʼun qeʼ xjal kʼujlaʼn qʼoj kyuʼn› (Salmo 11:5). Aju ‹tajbʼil xmilalj› atzun jun jlu «in che jaw kyaqpaj» xjal (Gálatas 5:19, 20).

Saqchbʼil. ‹Qa at jun in pon tkʼuʼj tiʼj nimku tiʼchaq [...] miʼn tzʼok kymojbʼaʼn kyibʼe tukʼil.› (1 Corintios 5:11.)

Ikʼbʼel tiʼj junxitl kyajil xjal. ‹Kykʼujlame qeʼ ajqʼoj kyiʼje, ex che naʼne Dios kyiʼj qeju in che ilin mo in che ok lipen kyiʼje.› (Mateo 5:43, 44.)

Nqo tzaj tkawin qMan Dios tuʼn qten tuj tbʼanel. Kwest tuʼn tel qikʼen aju mya bʼaʼn, tuʼnjo onbʼil ntzaj tqʼoʼn Jehová ex qeʼ tTestigos, jaku bʼant tuʼn tel tikʼune tiʼchaq mya bʼaʼn tuj twitz qMan Dios (Isaías 48:17; Filipenses 4:13; Hebreos 10:24, 25).