Tikʼo Satanás kyukʼe taqʼunal tuʼn qajbʼen te qMan Dios. Nkjyom tumel tzeʼn tuʼn kyel laqʼe nim xjal tiʼj qMan Dios. Tzaʼn ntena kyuʼn? A okslabʼil nya axix tok atzun junjo in najbʼen kyuʼn (2 Corintios 11:13-15). Qa mitiʼ nkubʼ t-xnaqʼtzaʼn axix tok tkuʼx tuj Xjan Uʼj, atzun jun okslaʼbʼiljo nya axix tok. Aju okslabʼil nya axix tok ik tten tzeʼnj pwaq nya axtok: iklo axtok jaku tzʼela toj qwitz ex mitiʼ tajbʼen. Nya oʼkxju, ax jaku tzaj nim mya bʼaʼn qiʼj tuʼn.

Aju kxnaqʼtzbʼil xjal te nya axix tok okslabʼil mya bʼaʼn in nela toj twitz Jehová, aju Dios te axix tok. Tej xten Jesús tzalu twitz Txʼotxʼ, aqe nejenel te okslabʼil kyajtoq tuʼn tkubʼ kbʼyoʼn Jesús. Nchi ximintaq qa aju kkʼulbʼel ateq ttxoliljo, nxiteq kyqʼamaʼn ‹Junx qeye qman at, a Dios›. Bʼaʼnpetzulo ela jlu toj twitz Jesús? Mya bʼaʼn. Xiʼ ttzaqʼweʼn kye: «Aqeye, atzun kymane tajaw il» (Juan 8:41, 44). Ax ikx jaʼlin, nim xjal nxi kximen qa nchi kʼulen te Dios, nya ik ttenjo, quʼn te Satanás ex kye taqʼunal nchi ajbʼen (1 Corintios 10:20).

 Ik tzaʼnj jun tzeʼ nya tbʼanel melay tzʼel tbʼanel twitz, ikxtzun tten okslabʼiljo nya axix tok mitiʼ nchi ok xjal tuʼn te tbʼanel. Tkyaqil twitz txʼotxʼ nojni tuʼn kʼixkʼoj, tuʼnjo nim tiʼchaq mya bʼaʼn nkubʼ kbʼinchan xjal. Atqeʼ xjal nchi bʼinchen mya bʼaʼn tukʼe kxmilal, qʼojelqeʼ, eleqʼqeʼ, jtzʼolqeʼ, bʼiyolqeʼ ix tzyul xuʼjqeʼ. Nim xjal nkubʼ kbʼinchen jlu at kyokslabʼil, aju okslabʼil lu mixtiʼ in nonin kyiʼj tuʼn tkubʼ kchʼixpuʼn kyibʼ tuj kyanqʼibʼil. Melay chi ok te tamiw qMan Dios, oʼkx qa ma kyaj kxoʼn aju mya bʼaʼn nkubʼ kbʼinchan (Mateo 7:17, 18).

A okslabʼil nya axix tok nchi kubʼ t-xnaqʼtzaʼn xjal tuʼn kkubʼ mejeʼ kwitz tilbʼilal mo junjuntl dios. A qMan Dios ntzaj qʼmante tuʼn miʼ qkubʼ ẍmejeʼ kwitz tilbʼilal. Axtokju. Quʼn qa at jun nyolin tukʼe qilbʼilal ex mitiʼx nyolin qukʼe bʼaʼntzulo jaku tzʼela tuj qwitz? Jakupetzulo tzʼok te qamiw? Melayx tzʼok. Taj qMan Jehová tuʼn kyolen xjal tukʼe, nya te jun sant tbʼinchbʼen xjal nix twitz jun tilbʼilal mitiʼ tchwinqlal (Éxodo 20:4, 5).

A okslabʼil nya axix tok nxnaqʼtzan qa jaku chi kubʼ bʼiyet xjal kyoj qʼoj. Tqʼama Jesús qa oktaq kʼokel kkʼuʼjlan kyibʼ tamiw qMan Dios. Mitiʼ nchi kubʼ qbʼiyoʼn xjal ayeʼ kʼujlaʼnqeʼ quʼn (Juan 13:35). Nixqeʼ xjal mya bʼaʼn kbʼinchbʼen melay chi kubʼ qbʼiyoʼn. Tej kxiʼ ajqʼoj qʼil te Jesús mitiʼ xi tqʼoʼn ambʼil kye t-xnaqʼtzbʼen, tuʼn kyok ten bʼiyel kyukʼe ajqʼoj tuʼn tklet kyuʼn (Mateo 26:51, 52).

Aju okslabʼil nya axix tok nxnaqʼtzan qa eyeʼ xjal mya bʼaʼn kbʼinchbʼen chi xeʼl tuj qʼaqʼ tuʼn kten toj kʼixkʼoj. Nya ikjo, quʼn ntzaj t-xnaqʼtzaʼn Xjan Uʼj qa tuʼn il ncheʼxa xjal tuj kamik (Romanos 6:23). A Jehová jun Dios te kʼujlabʼil. Jakupetzulo chi kux tqʼoʼn xjal tuj kʼixkʼojil te jumajx aju Dios te kʼujlalilxix? Melayx. Tuj Tbʼanel Najbʼil te Tzalajbʼil junx okslabʼil ktel, aju okslabʼil tbʼanilxix kʼelil tuj twitz Jehová (Apocalipsis 15:4). Aqetzun txqantl okslabʼil ateʼqeʼ tuj tsbʼubʼil Satanás otaq chi kubʼ najsaʼn.